Գիտնականները կարողացել են հաշվարկ անել լույսի միջոցով մազից բարակ օպտիկական մանրաթելում
Շոտլանդիայի Էդինբուրգի Heriot-Watt համալսարանի գիտնականները մշակել են օպտիկական սխեմաների ծրագրավորման նոր միջոց, որը կարող է օգտագործվել ապագա տեխնոլոգիաներ ստեղծելու համար, ինչպիսիք են անխոցելի կապի ցանցերը և գերարագ քվանտային համակարգիչները: Հետազոտության արդյունքները հրապարակվել են Nature Physics ամսագրում և համառոտ նկարագրված են Phys.org կայքում:
Նոր աշխատանքում ֆիզիկոսներն օգտագործել են առևտրային հասանելի օպտիկական մանրաթելեր, որոնք ավելի բարակ են, քան մարդու մազը և պարզել են, որ նրանք կարող են շատ ճշգրիտ ծրագրավորել դրանց ներսում առկա օպտիկական սխեմաները: Դրա համար նրանք ուսումնասիրել են մանրաթելի ներսում ֆոտոնների ցրման բարդ գործընթացը՝ հետագա հաշվարկներ իրականացնելու համար:
Օպտիկական սխեմաները կարևոր նշանակություն ունեն ապագա քվանտային տեխնոլոգիաների զարգացման համար, որոնք ստեղծվում են միկրոսկոպիկ մակարդակում՝ աշխատելով առանձին ատոմների կամ ֆոտոնների հետ: Օգտագործելով այս սխեմաները՝ հնարավոր է վերծանել տեղեկատվությունը քվանտային հաղորդակցության գծի վերջում, այն բանից հետո, երբ լույսը երկար տարածություն է անցել մանրաթելի երկայնքով: Դրանք նաև քվանտային համակարգիչների հիմնական մասն են և օգտագործվում են բարդ հաշվարկներ կատարելու համար:
Ակնկալվում է, որ քվանտային համակարգիչները մեծ առաջընթաց կունենան այնպիսի ոլորտներում, ինչպիսիք են դեղերի մշակումը, կլիմայի կանխատեսումն ու տիեզերքի հետախուզումը: Օպտիկական սխեմաները կարող են օգտագործվել նաև մեքենայական ուսուցման մեջ՝ հսկայական քանակությամբ տվյալներ շատ արագ մշակելու համար:
