Քաղաքական օրակա՞րգ, թե՞ պատրանք...

Արցախի ժողովրդի հավաքական հայրենադարձության և հիմնարար այլ իրավունքների պաշտպանության նպատակին կոչված Հանձնախումբն արդեն ձևավորված է: 

Հանձնախմբի անդամների առաջարկությամբ հանձնախմբի աշխատանքների համակարգումը կիրականացնի ՀՀ նախկին արտգործնախարար Վարդան Օսկանյանը:

Հիշեցնենք, որ այս հանձնախումբը ստեղծվել է Արցախի խորհրդարանի նախաձեռնությամբ, ավելի ստույգ՝ նրա հայաստանյան, այսպես ասած, վտարանդի գործունեության միակ արդյունքն է:

Հանձնախմբի ձևավորման հետ կապված գետնի վրա մի քանի հարցեր կան:

Արդյո՞ք այս ինստիտուտի ստեղծմամբ Արցախի պետական մարմինները հայտնվելու են ստվերում՝ իրենց լիազորությունները պատվիրակելով հանձնախմբին, թե՞ սա միջոց է լրացնելու Արցախի հարցով Հայաստանի իշխանության անգործության հետևանքով առաջացած վակուումը: Դժվար է միանշանակ պատասխան տալ այս հարցին, որովհետև Արցախի տարբեր գործիչների կողմից հնչել են իրարամերժ հայտարարություններ:

Մյուս կողմից, Վարդան Օսկանյանի կարգավիճակը նոր հանձնախմբում ունենալու է անխուսափելի ներքաղաքական հետևանք, որովհետև սրելու է հակադրությունը պաշտոնական  Երևանի և Արցախի իշխանությունների միջև:

Եվ վերջապես՝ որքանո՞վ է իրատեսական հանձնախմբի առաքելությունը, արդյո՞ք միջազգային օրակարգում տեսանելի ապագայում կարող է իրական դառնալ արցախահայության խնդիրը, անգամ՝ հումանիստական ասպեկտով:

Վահրամ Բագրատյան