Էրդողանն ու Պուտինը կրկի՞ն կհանդիպեն․ ինչ է հայտնի

Թուրքիայի և Ռուսաստանի նախագահներ Ռեջեփ Թայիփ Էրդողանը և Վլադիմիր Պուտինը կարող են նոր հանդիպում ունենալ ՄԱԿ-ում Թուրքիայի ղեկավարի շփումներից հետո, որտեղ սեպտեմբերի 19-25-ը տեղի կունենա կազմակերպության Գլխավոր ասամբլեայի բարձր մակարդակի շաբաթը։ Այս մասին հայտնում է թուրքական կառավարամետ Hürriyet թերթը։

Էրդողանը դրական է արձագանքել սեպտեմբերի 4-ին Սոչիում կայացած բանակցություններում աֆրիկյան աղքատ երկրներին 1 մլն տոննա հացահատիկի մատակարարման վերաբերյալ Պուտինի առաջարկին։ «Պուտինի հայտարարություններից մենք եզրակացրինք, որ հացահատիկային միջանցքի շուրջ բանակցությունները կշարունակվեն որոշ ժամանակով: Երկու ղեկավարներն էլ կարող են կրկին հանդիպել ՄԱԿ-ում Էրդողանի շփումներից հետո»,- գրում է Թուրքիայի նախագահի աշխատակազմին մոտ կանգնած հրատարակության սյունակագիր Աբդուլքադիր Սելվին։

Ինչպես ՏԱՍՍ-ին հայտնել է տեղի դիվանագիտական ​​աղբյուրը, Թուրքիան առաջիկա օրերին ՄԱԿ-ին կտեղեկացնի երկու երկրների նախագահների՝ Սեւծովյան հացահատիկի նախաձեռնության վերսկսման շուրջ Սոչիում կայացած բանակցությունների արդյունքների մասին։

Ելույթ ունենալով սեպտեմբերի 4-ին Սոչիում Պուտինի հետ բանակցություններից հետո կայացած մամուլի ասուլիսում, Էրդողանն ասել է, որ Անկարան ՄԱԿ-ի հետ միասին պատրաստել է նախաձեռնությունների նոր փաթեթ՝ նպատակ ունենալով վերսկսել սևծովյան հացահատիկի նախաձեռնությունը և հույս ունի, որ այն դրական կքննարկվի։ ՌԴ նախագահն իր հերթին ասել է, որ Մոսկվան պատրաստ է հացահատիկի գործարքին վերադառնալ մի քանի օրվա ընթացքում՝ ստամբուլյան համաձայնագրերով իրեն տրված խոստումների կատարման օրվանից։