Բնական հակադեպրեսանտ, ո՞ր մրգերի և բանջարեղենի մեջ են հայտնաբերել

Չունցինի բժշկական համալսարանի (Չինաստան) առաջին կից հիվանդանոցի գիտնականները պարզել են, որ լիկոպեն նյութը, որը գույն է հաղորդում մրգերին և բանջարեղենին, կարող է վերացնել դեպրեսիայի ախտանիշները։ Հետազոտության արդյունքները հրապարակվել են Food Science & Nutrition ամսագրում։

Լիկոպենը կարոտինոիդ պիգմենտ է, որը որոշում է որոշ բույսերի պտուղների գույնը, ինչպիսիք են լոլիկը, գուավան և ձմերուկը: Այս նյութը հզոր հակաօքսիդանտ է, որը պաշտպանում է բջջային թաղանթները ազատ ռադիկալների վնասից և ամրացնում է իմունային համակարգը։ Իր հատկությունների շնորհիվ լիկոպենը ակտիվորեն արտադրվում է որպես կենսաբանորեն ակտիվ սննդային հավելում։

Դեպրեսիվ պահվածքով մկների վրա նոր փորձի ժամանակ գիտնականները պարզել են, որ այս պիգմենտը կարող է նաև կայունացնել հուզական վիճակները։ Գիտնականները լիկոպեն են տվել կրծողներին, որոնց դեպրեսիան առաջացել է հիպոկամպուսի հետ կապված խնդիրների պատճառով՝ ուղեղի այն հատվածը, որը վերահսկում է ուսումն ու հիշողությունը, ինչպես նաև վերացական և վերլուծական մտածողությունը:

Վերլուծությունը ցույց է տվել, որ լիկոպենի ընդունումը կարող է մեծացնել ուղեղից ստացված նեյրոտրոֆիկ գործոնի (BDNF) մակարդակը՝ մի սպիտակուց, որը ներգրավված է օրգանների ֆունկցիայի շատ ասպեկտներում: Գիտնականները պարզել են, որ դեպրեսիա ունեցող մկների մոտ ճնշված է ազդանշանային ուղին, որը ներառում է BDNF (այսպես կոչված BDNF-TrkB ուղին, որն օգնում է կարգավորել ուսումը, հիշողությունը և նեյրոնների միջև հաղորդակցությունը): Լիկոպենը ակտիվացնում է BDNF-TrkB-ն՝ դրանով իսկ նվազեցնելով դեպրեսիայի ախտանիշները։

Հետազոտողները ասում են, որ իրենց աշխատանքը հզոր հնարավորություններ է բացում դեպրեսիայի դեմ դեղորայքային բուժման նոր միջոցներ մշակելու համար: Հետազոտության հեղինակները նախատեսում են նաև հետագա հետազոտություններում շարունակել լիկոպենի հատկությունների փորձարկումը: Նրանք պարզաբանել են, որ հետագա փորձերը կենտրոնանալու են ուղեղի մի քանի այլ հատվածների վրա։