Հումանիտար ճգնաժամ Արցախում. օղակը սեղմվում է
«Դուք մուտք եք գործում Ադրբեջանի Հանրապետության տարածք». արդեն այսպիսի եռազելու ցուցանակ է տեղադրվել Հակարիի կամրջի վրա։
Ադրբեջանական կողմն ավարտին է հասցնում երկու օր առաջ տեղադրված անցակետի ձևավորումը:
Ի դեպ, մինչ հայաստանյան «հաստիքային» արևմտամետները տեղի ունեցածի մեջ մեղադրում են բացառապես Ռուսաստանին՝ Բաքուն վկայակոչում է Ադրբեջանի տարածքային ամբողջականությունը ճանաչելու մասին Երևանի հայտարարությունները։ Ադրբեջանի արտգործնախարարությունը հիշեցրել է Պրահայի և Սոչիի պայմանավորվածություններն՝ օրինական որակելով անցակետի տեղադրումը։
Ավելին, փուչիկի պես պայթում է Փաշինյանի իշխանության մեկ այլ նարատիվ, թե իբրև զոհաբերելով Արցախը՝ հնարավոր է փրկել Հայաստանի տարածքային ամբողջականությունը:
«Երևանը պետք է ութ պահանջ կատարի Ադրբեջանի հետ հարաբերությունները նորմալացնելու համար, այդ թվում՝ վերադարձնի սահմանամերձ ութ գյուղեր»,- երկուշաբթի ելույթ ունենալով ՄԱԿ-ի Անվտանգության խորհրդի բաց քննարկմանը՝ ասել է ՄԱԿ-ում Ադրբեջանի մշտական ներկայացուցիչ Յաշար Ալիևը։
Ադրբեջանի ներկայացուցիչն օրակարգ է բերում, այսպես կոչված, անկլավների խնդիրը:
Իսկ Արցախում հումանիտար ճգնաժամը ավելի խորանում է. Ադրբեջանի կողմից լրացուցիչ սահմանափակումները հանգեցրել են նույնիսկ նվազագույն ծավալի կենսական նշանակության ապրանքների ներկրման անհնարինության։
Միակ լավատեսական լուրն այն է, որ Արցախի կառավարության և ՌԴ խաղաղապահ զորակազմի ջանքերի արդյունքում երեկ երեկոյան հաջողվել է որոշակիորեն վերականգնել վերջին օրերին խափանված հումանիտար բեռների ներկրումը Հայաստանից: Բայց բոլորս ենք հասկանում՝ սա ելք չէ...
Օր 136-րդ. Արցախի շուրջ օղակը սեղմվում է...
Վահրամ Բագրատյան
