ՀՀ խաբված քաղաքացիներն այլևս չեն ցանկանում լսել Փաշինյանի մոնոլոգը

ՀՀ վարչապետ Նիկոլ Փաշինյանը Ֆեյսբուքի իր էջում տեղեկացրել է, որ ֆեյսբուքյան եթերում կպատասխանի լրատվամիջոցների և հասարակական կազմակերպությունների հարցերին:

2018թ.-ից մինչև այսօր ՔՊ-ն ՀՀ քաղաքացիներին մոլորեցրել է տարբեր քաղտեխնոլոգիաների և հազարավոր ֆեյքերի միջոցով՝ մեդիամանիպուլյացիան դարձնելով իշխանության պահպանման հիմնասյուն:

Ինչ պետք է Փաշինյանը ներկայացնի ՀՀ քաղաքացիներին՝ կազմաքանդված տնտեսություն՝ ռեկորդային գնաճով, զրո նոր աշխատատեղերով, ահռելի թվերի հասնող արտագաղթով, փլատակների վերածված Արցախով՝ հայոց պարծանք Շուշիում այսօր ծածանվում է ադրբեջանական դրոշ, թե «խաղաղության դարաշրջան», երբ գրեթե ամեն ամիս հայ զինծառայող է զոհվում կամ վիրավորվում հայ-ադրբեջանական սահմանին:

ՀՀ քաղաքացիները պետք է անտեսեն և չհետևեն Փաշինյանի ասուլիսին, այլապես հանդիպելու են ամեն ինչում կրկին «նախկիններն» են մեղավոր արդեն անտանելի դիտարկմանը:

Սակայն եթե ՀՀ քաղաքացիներին դուր է գալիս, երբ իրենց խաբում են, ապա Փաշինյանի «փաստարկները» նրանք կարող են ընդունել ի գիտություն և շարունակել ապրել Հայաստանում, որտեղ միայն ՔՊ-ականներն են լավ ապրում, իսկ հասարակության ճնշող մեծամասնությունն աղքատ է:

ՔՊ-ն արդեն մի քանի տարի է իշխանության է, սակայն ՀՀ քաղաքացիներն իրենց մաշկի վրա չեն զգում որևէ դրական փոփոխություն՝ կյանքի որակը, սոցիալական վիճակը միայն վատթարանում են, իսկ ՔՊ-ն շարունակում է խաղալ հասարակության էմոցիաների վրա՝ «վախեցնելով» հասարակությանը «նախկինների» վերադարձով:

Փաշինյանը փորձելու է ՀՀ քաղաքացիներին մատուցել նոր «ձեռքբերումներ»՝ Ադրբեջանի հետ խաղաղության մասին հայտարարությամբ, սակայն խաղաղություն չի լինելու, քանի որ Բաքուն ցանկանում է հայաթափել Արցախը և գրավել այսօրվա ՀՀ ողջ տարածքը:

Բացի այդ, ՔՊ-ի լիդերը խոսելու է «բարեփոխումների» մասին, սակայն դա ոչինչ չասող բառ է, քանի որ բարեփոխումների արդյունքում մարդկանց կյանքը պետք է շոշափելիորեն լավանա, այլ ոչ թե վատանա:

Արդյունքում, մեր քաղաքացիներն իրենց ժամանակը կարող են անհամեմատ ավելի արդյունավետ օգտագործել, քան Փաշինյանի առաջարկած ասուլիսին հետևելն է:

Համոզված ենք՝ ՀՀ խաբված քաղաքացիներն այլևս չեն ցանկանում լսել Փաշինյանի մոնոլոգը:

Վահրամ Բագրատյան