ՍԱՏՄ նախկին ղեկավար Արմեն Դանիելյանը ձերբակալվել է. մանրամասներ
Արմեն Դանիելյանը, ով օրերս ՍԱՏՄ ղեկավարի պաշտոնից ազատման դիմում էր գրել, ձերբակալվել է:
Լուրը MediaHub-ի հետ զրույցում հաստատեց Հակակոռուպցիան կոմիտեի նախագահի խոսնակ Մարինա Օհանջանյանը:
«ՍԱՏՄ նախկին ղեկավարը ձերբակալվել է ծառայողական լիազորություններն օգտագործելով առանձնապես խոշոր չափերի գույք հափշտակելու մեղադրանքով։ Նրա նկատմամբ կալանքը որպես խափանման միջոց կիրառելու միջնորդություն է ներկայացվել դատարան»,- հայտնեց Օհանջանյանը:
Օրերս գրել էինք, որ ՍԱՏՄ ղեկավար Արմեն Դանիելյանը պաշտոնից ազատման դիմում է ներկայացրել, ինչը MediaHub-ի հետ զրույցում հաստատել էր ՍԱՏՄ իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը:
Հիշեցնենք, որ դեկտեմբերին ձերբակալվել էին ՍԱՏՄ տեսուչներ՝ գառների կարանտինի գործով: Չի բացառվում, որ այս ազատումը կապ ունի հենց այս՝ յուրացումների գործի հետ:
Արմեն Դանիելյանը անցած տարվա նոյեմբերին էր նշանակվել այս պաշտոնին: Մինչ այդ նա զբաղեցնում էր վարչապետի աշխատակազմի տեսչական մարմինների աշխատանքների համակարգման գրասենյակի ղեկավարի տեղակալի պաշտոնը:
Նարե Գնունի
