Նիկոլո Ձանյոլոն մոտ մեկ ամիս չի կարողանա օգնել «Ռոմային»

«Ռոմայի» իտալացի կիսապաշտպան Նիկոլո Ձանյոլոն ուսի հոդի վնասվածք է ստացել «Կրեմոնեզեի» դեմ Իտալիայի առաջնության երկրորդ տուրի խաղում։ Պորտուգալացի Ժոզե Մոուրինյոյի գլխավորած թիմն առավելության էր հասել նվազագույն հաշվով անգլիացի պաշտպան Կրիս Սմոլինգի գոլի շնորհիվ։

23-ամյա Նիկոլո Ձանյոլոն փոխարինվել էր առաջին խաղակեսի վերջնամասում։ Նա բաց կթողնի մոտ մեկ ամիս, հաղորդում է Sky Sport Italia-ն։ Վիրահատություն չի պահանջվի։

Մեկ օր առաջ մարզման ժամանակ սրունքի կոտրվածք էր ստացել «Ռոմայի» նորեկ, հոլանդացի կիսապաշտպան Ժորժինյո Վեյնալդումը, որը մի քանի ամիս չի կարողանա դուրս գալ խաղադաշտ։