1100 մարդ այս պահին մնացել է ճանապարհին, այդ թվում՝ 270 երեխաներ․ Արցախի ՄԻՊ
Այս պահին Արցախում 120 հազար մարդ գտնվում է շրջափակման մեջ։ Այդ մասին այսօր հրավիրված մամուլի ասուլիսում ասաց Արցախի ՄԻՊ Գեղամ Ստեփանյանը։
Նրա խոսքով՝ Արցախն օդային հաղորդակցություն չունի աշխարհի որևէ կետի հետ, և խախտվում են մարդու իրավունքները։
«Մեկ օր է, ինչ խախտված է արցախցու իրավունքը, և դա արվում է Ադրբեջանի իշխանությունների կողմից՝ Ալիևի ուղղորդմամբ ու հրահանգներով։ Շրջանառվող բնապահպանական թեզերը կեղծ են, մենք ունենք տեղեկություններ, որ ճանապարհը փակողները Ադրբեջանի հատուկ ծառայության ներկայացուցիչներ են»,- ասաց նա։
Անդրադառնալով ադրբեջանական հանցավոր գործողությունների հումանիտար հետևանքներին՝ Գեղամ Ստեփանյանը նշեց, որ այս պահի դրությամբ 24 ժամից ավելի է՝ դադարեցված է սննդամթերքի, դեղորայքի, էներգակիրների և այլ անհրաժեշտ ապրանքների մատակարարումը ամբողջ Արցախի տարածքում։
«Ահազանգեր ենք ստանում, որ բուժհաստատություններում մի քանի օրվա դեղորայքային պաշար կա, և այսպես շարունակվելու դեպքում այս հարցում շատ լուրջ խնդրի առաջ ենք կանգնելու»,- ներկայացրեց Արցախի ՄԻՊ-ը։
Նա տեղեկացրեց, որ նույնը վերաբերում է սննդի ու դիզվառելիքի մատակարարմանը։
«1100 մարդ այս պահին մնացել է ճանապարհին, այդ թվում՝ 270 երեխաներ, որոնք կտրվել են ընտանիքներից։ Սա ադրբեջանական կողմից դեպի մեզ ուղղված էթնիկ զտման, ցեղասպանության հերթական բաղադրիչն է»,- շեշտեց նա։
Մանրամասները՝ տեսանյութում։
