Խոշոր ավտովթար՝ Կոտայքիում. ճակատ ճակատի բախվել են Range Rover-ն ու Volkswagen Vento-ն, վիրավոր կա

Այսօր՝ նոյեմբերի 29-ին, խոշոր ավտովթար է տեղի ունեցել Կոտայքի մարզում: Ժամը 13:20-ի սահմաններում Երևան-Սևան ավտոճանապարհի 20-րդ կմ հատվածում ճակատ ճակատի բախվել են Range Rover և Volkswagen Vento մակնիշի ավտոմեքենաները:

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 4 հոգի քաղաքացիների և օպերատիվորեն ժամանած ՀՀ Ներքին գործերի նախարարության փրկարար ծառայության Աբովյանի թիվ 45 հրշեջ-փրկարարական ջոկատի հրշեջ-փրկարարների օգնությամբ դուրս են բերվել ավտոմեքենաներից և պատգարակներով մոտեցրել են օպերատիվորեն ժամանած «Աբովյան» բժշկական կենտրոնի և Բյուրեղավանի բժշկական ամբուլատորիայի շտապօգնության ավտոմեքենաներին:

Բժիշկները վիրավորներին  նախ տեղում առաջին բուժօգնությունն են ցուցաբերել, ապա 2-ին տեղափոխել են «Աբովյան» բժշկական կենտրոն, իսկ 2-ին, ովքեր գտնվում էին ծայրահեղ ծանր վիճակում, տեղափոխել են Հերացու անվան թիվ 1 համալսարանական հիվանդանոց:

Վթարից հետո առաջացել էր մոտ 2.5-3 կմ խցանում, սակայն շնորհիվ պարեկների օպերատիվ և ճիշտ գործողությունների, ճանապարհը հաշված րոպեների ընթացքում բացվեց և դարձավ երթևեկելի:

Տեղում քննչական աշխատանքները ղեկավարող Գ. Դալլաքյանի որոշմամբ՝ ավտոմեքենաները տեղափոխվում են ոստիկանության Կոտայքի բաժնի պահպանվող հատուկ տարածք:

Ոստիկանությունն ու քննչական բաժինը պարզում են վարորդների և վիրավորների ինքնությունը: