Եթե մեկն ապացուցի, որ ամառային անվադողով ՇՕ մեքենա կա, դիմում կգրեմ, ներողություն կխնդրեմ, կգնամ. տնօրեն

Արխիվային լուսանկար

Երեկվանից սկսած Երևանի «Շտապ օգնություն» ՓԲԸ է դիմել 831 քաղաքացի: Այդ մասին MediaHub-ի հետ զրույցում ասաց «Շտապ օգնության» տնօրեն Ռուբեն Գրիգորյանը:

Նա նկատեց` 2 կանչով միայն չեն հասցրել ժամանակին մոտենալ, և բարեբախտաբար, թեթև դեպքեր են եղել:

«Անխոչընդոտ կարողացել ենք աշխատել, չնայած մամուլը գրում էր, թե մեքենաներն ամառային անվադողով էին»,- նշեց Գրիգորյանը:

Հարցին, թե արդյո՞ք ամառային անվադողերով ՇՕ մեքենաներ չեն եղել երեկ, Ռուբեն Գրիգորյանը պատասխանեց` ոչ:

«Եթե էդ մեքենա բրդելու դեպքերն եք ասում, ապա նման մոտ տասը դեպք է եղել: Դա անվադողերի ամառային-ձմեռային լինելու հետ կապ չունի: Ես ո՞նց կարող եմ մարդկանց կյանքերի հետ խաղալ: Եթե մեկն ապացուցի, որ ամառային անվադողով ՇՕ մեքենա կա, ես դիմում կգրեմ, ներողություն կխնդրեմ, կգնամ: Ախր դա էն բանն ա, որ ամեն տարի նորն առնում ու փոխում ենք սեզոնին, անկախ նրանից՝ ձյուն կա, թե չէ»,- նշեց նա:

Քանի որ ոչ միայն երթևեկելի մասերն են անմխիթար վիճակում, այլ նաև մայթերը, հետաքրքրվեցինք, թե սայթաքել, ընկնելու հետ կապված վնասվածքների ինչ վիճակագրություն կա:

«Ժամը 12-ի դրությամբ 7 դեպք ունենք, նախնական կարող եմ ասել, որ կոտրվածքներ են, բայց ավելի կոնկրետ բուժող բժիշկը կասի»,- ասաց Ռուբեն Գրիգորյանը:

Նարե Գնունի