Հայաստան տեղափոխված ՌԴ քաղաքացիներն իրենց հետ 1.7 մլրդ դոլար են բերել. սա նախորդ տարվա համեմատ 155 տոկոսով ավելի է. ԿԲ

2022թ-ի 9 ամիսների ընթացքում Հայաստան է փոխանցվել 1.7 մլրդ դոլար։ Այս մասին այսօր՝ նոյեմբերի 1-ին, մամուլի ասուլիսի ժամանակ նշեց ԿԲ մակրոտնտեսական դեպարտամենտի տնօրեն Արմեն Նուրբեկյանը։

«Սա շատ բարձր թիվ է։ Նախորդ տարվա նույն ժամանակահատվածի համեմատ 155 տոկոսով ավելի է»,-ասաց նա՝ հավելելով, որ հրապարակված ամբողջ գումարը Հայաստան է փոխանցվել բանկային փոխանցումների ձևով ու գրեթե ամբողջությամբ Ռուսաստանից։

ԿԲ նախագահի դիտարկմամբ` փոխանցումների նման աճը պայմանավորած է ոչ թե ՌԴ–ում աշխատող հայաստանցի միգրանտներով, այլ ժամանակավորապես ՀՀ տեղափոխված ռուսաստանցիներով. «Աճի մեծ մասը հիմնականում միջազգային այցելուների կողմից իրենց ֆինանսական միջոցները ՌԴ–ից կամ այլ երկրներից Հայաստան տեղափոխելու հետ է կապված»,– ասաց Մարտին Գալստյանը։