ԱԳ փոխնախարարը և Ուզբեկստանի իր գործընկերը քննարկել են հարցերի լայն շրջանակ
Օգոստոսի 3-ին Տաշքենդում տնտեսական համագործակցության հարցերով հայաստանա-ուզբեկստանյան միջկառավարական հանձնաժողովի նիստի շրջանակներում ՀՀ ԱԳ նախարարի տեղակալ Մնացական Սաֆարյանը հանդիպում է ունեցել Ուզբեկստանի ԱԳ նախարարի տեղակալ Բոբուր Ուսմանովի հետ: Այս մասին հայտնել է ՀՀ արտաքին գործերի նախարարությունը։
Երկկողմ հարաբերությունների զարգացման համատեքստում կողմերը «քննարկել են ՀՀ և ՈւՀ միջև քաղաքական երկխոսության հետագա խթանմանը, արտաքին քաղաքական գերատեսչությունների միջև պարբերական շփումների ակտիվացմանը, ինչպես նաև հումանիտար ու մշակութային նախագծերին առնչվող հարցերի լայն շրջանակ»։
«ՀՀ ԱԳ նախարարի տեղակալը ներկայացրել է Հայաստանի Հանրապետության և Լեռնային Ղարաբաղի նկատմամբ Ադրբեջանի կողմից ուժի կիրառման քաղաքականության դրսևորումները, որոնք խաթարում են Հարավային Կովկասում խաղաղության և անվտանգության հաստատմանն ուղղված հայկական կողմի ջանքերը։ Մնացական Սաֆարյանը նաև ընդգծել է Ադրբեջանի կողմից Լաչինի միջանցքի ապօրինի արգելափակման հետևանքով Լեռնային Ղարաբաղում ժամ առ ժամ ահագնացող հումանիտար ճգնաժամի և Լաչինի միջանցքի ապօրինի արգելափակման անհապաղ վերացման հրամայականը»,- ասված է հաղորդագրության մեջ:
