Բժիշկը դիաբետով հիվանդներին խորհուրդ է տվել իրենց սննդակարգում այս միրգն ավելացնել
Սննդաբան, բժշկական գիտությունների թեկնածու Նատալյա Դենիսովան դիաբետով հիվանդներին և սրտային հիվանդներին խորհուրդ է տվել սննդակարգում գրեյպֆրուտ ավելացնել։ Բժիշկը aif.ru-ին պատմել է այս մրգի օգտակարության մասին։
Ըստ Դենիսովայի՝ գրեյպֆրուտը պարունակում է նարինգենին նյութ, որն օգնում է օրգանիզմից հեռացնել ավելորդ խոլեստերինը և օգնում բջիջներին վերականգնել ինսուլինն ընկալելու ունակությունը, որն իրենք արտադրում են։
Սննդաբանը նշել է, որ նարինգենինը պարունակվում է մրգի սպիտակ երակներում և տալիս է դառնություն, ուստի մրգից ավելի շատ օգուտներ ստանալու համար ավելի լավ է միջուկի հետ միասին ուտել սպիտակ երակները։
Սրտի հիվանդություններ ունեցող մարդկանց համար, ըստ մասնագետի, գրեյպֆրուտն օգտակար է կալիումի պատճառով, որն օգնում է կարգավորել արյան ճնշումը և սրտի ռիթմը։ «Գրեյպֆրուտի հակաօքսիդանտները (ֆենոլաթթուներ, ֆլավոնոիդներ, կարոտինոիդներ, լիկոպեն) կանխում են արյան անոթներում միկրոբորբոքումների զարգացումը, ինչը կօգնի կանխարգելել աթերոսկլերոզը»,- ընդգծել է բժիշկը։
Միաժամանակ, ինչպես նշեց դիետոլոգը, կան որոշակի սահմանափակումներ գրեյպֆրուտ օգտագործելիս, օրինակ՝ այս ցիտրուսի հյութի հետ խորհուրդ չի տրվում ընդունել ցավազրկողներ, հակադեպրեսանտներ, հակաբիոտիկներ, հորմոնալ հակաբեղմնավորիչներ և մի քանիսը։
Դենիսովան բացատրել է, որ գրեյպֆրուտի միջուկը պարունակում է ֆուրանոկումարին կոչվող նյութ, որը կարող է նվազեցնել այդ դեղամիջոցների արդյունավետությունը։
«Գրեյպֆրուտը պետք է զգուշությամբ օգտագործեն նաև ստամոքսի և տասներկումատնյա աղիքի խոցով հիվանդները, հեպատիտով, խոլեցիստիտով, պանկրեատիտով, աղիների քրոնիկ բորբոքային հիվանդություններով և ցիտրուսային մրգերի նկատմամբ ալերգիա ունեցող հիվանդները»,- զգուշացրել է Նատալյա Դենիսովան:
Նա նաև խորհուրդ է տվել գրեյպֆրուտի հյութ խմել ծղոտով, որպեսզի նվազեցնի թթվի կործանարար ազդեցությունը ատամի էմալի վրա:
