Իրավական որևէ հիմք չկա Խաչատուրովին կալանավորելու, բայց նիկոլական Հայաստանում ամեն ինչ սպասելի է․ Մանուկյան

Գիշերը թույլ չեն տվել դեղերը հասցնել Գրիգորի Խաչատուրովին։ MediaHub.am-ի հետ զրույցում այս մասին ասաց «Հայաստան» խմբակցության պատգամավոր Գեղամ Մանուկյանը։

Նա նշեց, որ ամբողջ գիշեր Հակակոռուպցիոն դատարանի բակում են եղել, որտեղ այսօր 12-ին կքննվի 3-րդ բանակային կորպուսի նախկին հրամանատար, գեներալ Գրիգորի Խաչատուրովի նկատմամբ կալանքը որպես խափանման միջոց ընտրելու հարցը։

«Իրավական որևէ հիմք չկա կալանքի տանելու, բայց նիկոլական Հայաստանում ամեն ինչ սպասելի է»,- ասաց Մանուկյանը։

Նա շեշտեց՝ Խաչատուրովի նկատմամբ իրականացվողը քաղաքական հետապնդում է։

Մանուկյանը նկատեց՝ Սեյրան Օհանյանի նկատմամբ հանրային քրեական հետապնդում սկսելու հաջորդ քայլը սա պիտի լիներ․ Փաշինյանի վրեժն է բանակի գեներալներից։

Հիշեցնենք, որ ավելի վաղ հայտնի դարձավ, որ 3-րդ բանակային կորպուսի նախկին հրամանատար, գեներալ Գրիգորի Խաչատուրովը ձերբակալվել է։

Նարե Գնունի