Վրաստանի խորհրդարանի նախագահը հրաժարվել է Կիևի հրավերով այցելել Բուչա
Վրաստանի խորհրդարանի նախագահ Շալվա Պապուաշվիլին «անպատեհ» է անվանել ուկրաինական Բուչա քաղաք այցելելու Կիևից ստացած առաջարկը։
Պապուաշվիլին Բուչա այցելելու հրավեր էր ստացել Ուկրաինայի Գերագույն Ռադայի նախագահ Ռուսլան Ստեֆանչուկից։ Նմանատիպ նամակներ ուղարկվել էին նաև այլ երկրների օրենսդիր մարմինների ղեկավարներին:
Պատասխան նամակում Վրաստանի խորհրդարանի նախագահը մաղթել է, որ «ուկրաինական իշխանությունների առանձին ներկայացուցիչներ լիովին ընկալեն այն ամուր աջակցությունը, որը Վրաստանի ժողովուրդը և նրա իշխանությունները ցուցաբերում են Ուկրաինայի իշխանություններին և ուկրաինացի ժողովրդին»։
«Մեր երկրների այս աջակցությունն ու գործընկերությունը արժանի չեն ուկրաինական իշխանությունների բարձրաստիճան պաշտոնյաների՝ վրաց ժողովրդին իրենց կառավարությունից անջատելու փորձերին, Վրաստանում երկրորդ ճակատ բացելու պահանջներին, դիվանագիտական անհիմն դեմարշներին, մաքսանենգության անհիմն մեղադրանքներին կամ ուկրաինացիների դժբախտությունների վրա «ձեռքերը տաքացնելու» մեղադրանքներին»,- ասված է Պապուաշվիլիի ֆեյսբուքյան էջում հրապարակված հայտարարության մեջ։
«Այդ հարցերի չհասկացվածության ֆոնին պաշտոնական առաջարկն անտեղի է թվում»,- ընդգծել է խորհրդարանի նախագահը։
Նա նաև հավելել է, որ Ուկրաինային աջակցելը համարում է Վրաստանի «մարդկային և պատմական պարտքը»՝ վստահեցնելով, որ իշխանությունները «կկատարեն այդ պարտականությունը, որքան էլ ի պատասխան հնչեն անարդար ու անհիմն մեղադրանքներ»։
