Շոլցը թույլ չի տվել ֆոն դեր Լայենին առաջադրել ՆԱՏՕ-ի գլխավոր քարտուղարի պաշտոնի համար․ Welt
Գերմանիայի կանցլեր Օլաֆ Շոլցը կանխել է Եվրոպական հանձնաժողովի (ԵՀ) նախագահ Ուրսուլա ֆոն դեր Լայենի թեկնածությունը ՆԱՏՕ-ի գլխավոր քարտուղարի պաշտոնի համար։ Գրել է Welt am Sonntag-ը։
Պատճառը, ի թիվս այլնի, եղել է ԵՀ-ի ղեկավարի հակառուսական դիրքորոշումը։
Թերթը գրել է, որ 2023 թվականի վերջին Միացյալ Նահանգների պետական քարտուղար Էնթոնի Բլինքենը ֆոն դեր Լայենի թեկնածությունն առաջարկել է ԱՄՆ նախագահ Ջո Բայդենին։ Նա դիմել է Շոլցին, սակայն կանցլերը «կտրականապես դեմ է եղել» նրա առաջադրմանը։
Կանցլերի խոսքով՝ Ուրսուլա ֆոն դեր Լայենը չափազանց քննադատաբար է վերաբերվում Ռուսաստանի Դաշնությանն, ու մտավախություն ունի, որ դա երկարաժամկետ հեռանկարում բացասական հետևանքներ կունենա։
Welt am Sonntag-ը նաև նշել է, որ ՆԱՏՕ-ի գլխավոր քարտուղարի պաշտոնի թեկնածուների մեջ ֆավորիտը դարձել է Նիդեռլանդների վարչապետի պաշտոնակատար Մարկ Ռյուտեն։
Վերջնական որոշումը նախատեսվում է ընդունել մինչև հունիսին կայանալիք Եվրախորհրդարանի ընտրությունները։
Bloomberg-ը հայտնել է, որ Թուրքիան պայմաններ է առաջադրել Ռյուտեի թեկնածությունը հաստատելու համար։
Յենս Ստոլտենբերգը ՆԱՏՕ-ի գլխավոր քարտուղարի պաշտոնը զբաղեցնում է 2014 թվականի հոկտեմբերից։ Դաշինքի գլխավոր քարտուղարը նշանակվում է դաշինքի անդամ երկրների միջև ոչ պաշտոնական խորհրդակցությունների միջոցով, որոնք թեկնածուներ են առաջադրում այդ պաշտոնում։ Գլխավոր քարտուղարն ընտրվում է չորս տարով, անհրաժեշտության դեպքում ժամկետը կարող է երկարաձգվել։
