Իմ ավագանու անդամներն այն մարդիկ չեն, որոնց կարող են «վերբովկա» անել․ Առուշ Առուշանյան

Այսօր մամուլում հայտնվեց տեղեկություն, թե Ալավերդիում իշխանությունը զավթելուց և «Ապրելու երկիր» կուսակցությունից ընտրված քաղաքապետ Արկադի Թամազյանին պաշտոնանկ անելուց հետո հաջորդը նույն ճակատագրին արժանանալու է Գորիսի քաղաքապետ Առուշ Առուշանյանը։

«Թեեւ նա վերջերս ակնհայտորեն փոխել է իր վերաբերմունքը Նիկոլ Փաշինյանի իշխանության նկատմամբ, բայց, ամեն դեպքում, Առուշանյանին եւս ՔՊ-ականները որպես իրենց ընդդիմադիր են դիտարկում»,- գրել էր մամուլը նրա մասին։

Mediahub-ն այս թեմայով զրուցեց Առուշ Առուշանյանի հետ, որի գլխավորած «Առուշանյան դաշինք» խմբակցությունը Գորիսի ավագանու 21 հոգանոց կազմում ունի 14 մանդատ։ 

-Պարոն Առուշանյան, մամուլն այսօր գրել էր, որ Ալավերդու քաղաքապետից հետո հաջորդը Ձեզ են իմփիչմենթ անելու և հեռացնեն պաշտոնից։ 
-Ես ուզում եմ հասկանալ՝ ընտրված քաղաքապետին ո՞նց են հանում, եթե մեծամասնությունը իմ ավագանու անդամներն են, ուզում եմ հասկանալ՝ իմ ավագանու անդամները ինձ պիտի հանե՞ն գործից։ 

-Օրինակ՝ Ձեր խմբակցության ավագանու անդամներից մեկին կամ մի քանիսին իրենցով անել կամ «վերբովկա» անել, ինչպես տեղի ունեցավ Ալավերդիում, որից հետո կնախաձեռնեն արդեն անվստահության գործըթնաց Ձեր նկատմամբ։
 - Նման բան Գորիսում չկա, նման քննարկում չկա, իմ ավագանու անդամներն այն մարդիկ չեն, որոնց կարող են «վերբովկա» անել: Առհասարակ նման քննարկում երբևէ չի եղել, չկա ու չի էլ կարող իմ ավագանու անդամը սրա-նրա կողմից «վերբովկա» լինի։ 

-Իսկ այն, որ Ձեր վերաբերմունքը մեղմացել է իշխանությունների, Նիկոլ Փաշինյանի նկատմամբ, որը նկատելի դարձավ հատկապես Ձեր վերջին հարցազրույցից հետո, և որ այլևս նախկին սուր ընդդիմադիր կեցվածքը չկա Ձեր կողմից, դրա վերաբերյալ ի՞նչ կասեք։ 
-Առհասարակ, հիմա  քաղաքական որևէ գործունեությամբ ընդհանրապես չեմ զբաղվում, զբաղվում եմ Գորիսի առջև ծառացած խնդիրներով, մեր սահմաններով, մեր հազար ու մի պրոբլեմով։ 

-Իսկ եթե քաղաքական պրոցես լինի, նորից կակտիվանա՞ք։ 
-Էս փուլում՝ չէ։ 

-Տպավորություն է, որ այս իշխանություններին հաջողվեց Սյունիքի համայնքապետերին, Սյունիքի ուժեղ դեմքերին քաղաքական իմաստով կոտրել, խեղճացնել, ճնշել։
 -Մեզ ոչ մեկը ոչ կարա կոտրի, ոչ էլ մենք էդ տեսակն ենք, մենք պատրոնից չենք փախչում, ինչի՞ մասին կարա խոսք լինի։ Երկրորդը, ես ինքս եմ որոշում կայացրել, որ էլ չեմ ուզում դրա մեջ լինել։ Շատ վաղուց էդ որոշումը կայացրել եմ ու դա չեմ կայացրել ձեռքի հետ, էդ որոշումը կայացրել եմ ու դրա մասին էլ արտահայտվել եմ։ Որ րոպեին կուսակցությունից դուրս եմ եկել (նկատի ունի Վահե Հակոբյանի գլխավորած «Վերածնվող Հայաստան» կուսակցությունը-խմբ․), դա իմ դիրքորոշումն է եղել, որ ես առհասարակ այլևս էդ պրոցեսների մեջ չեմ մտնի։ Ու երկրորդը՝ էն, ինչ վերաբերում է նրան, որ ես եղել եմ կալանքի մեջ, կալանքից դուրս եմ եկել, պրոցեսներ և այլն, և այլն, ի՞նչ է նշանակում՝ էդքանից հետո անցնել էս կողմ։ Իմ որոշումը էդպես է եղել, 2021 թվականին եղել են քաղաքական պրոցեսներ, իմ դիրքորոշումը ես հայտնել եմ՝ բոլորը գիտեն, հիմա չկան քաղաքական պրոցեսներ՝ մենք մեր աշխատանքին ենք։ Ինչ վերաբերում է նրան, որ էս պահին քաղաքական ինչ-որ պրոցեսներ լինեն, դրանց ես ներգրավվածություն ունենալո՞ւմ եմ, թե՞ չէ՝ չէ, չեմ ունենալու։ 

-Կարո՞ղ է նաև կալանքի հանգամանքն է նպաստել, որ պասիվանաք, որ նորից կալանքի վտանգ չսպառնա Ձեզ։ 
-Ես կարծում եմ՝ բոլորն էլ հիշում են, որ ես կալանքից հետո նույնպես շարժումներին մասնակցել եմ։ Գործողություններին մասնակցել եմ ու դրանից հետո եմ որոշել, որ հիմա մենք մեր քաղաքի, մեր խնդիրների հարցով ենք։

 -Իսկ ստացվո՞ւմ է այս կառավարության, Սյունիքի մարզպետի, տարածքային կառավարման նախարարության հետ աշխատել։ Ձեզ յուրային ընկալո՞ւմ են։ 
-Կոնկրետ մարզպետի հետ շատ նորմալ, շատ ջերմ աշխատանքային մթնոլորտ է, տարածքային կառավարման նախարարության հետ շատ նորմալ, ջերմ մթնոլորտ է աշխատանքային։ Իրար հետ բազմաթիվ խնդիրներ ենք լուծում՝ ի նպաստ մեր ժողովրդի, մեր երկրի։

-Բայց կարողանո՞ւմ է այս իշխանությունը նպաստ բերել երկրին, ժողովրդին՝ հաշվի առնելով, թե ինչ բերեց Արցախի գլխին, Սյունիքի սահմաններին։ 
-Դրա մասին 2021 թվին, ասում եմ, էդ բոլոր պրոցեսների մասին խոսել ենք։ Հիմա կոնկրետ եթե նկատի ունեք մարզպետարանն ու տարածքային կառավարման նախարարությունը ինչ-որ խնդիրներին լուծում տալիս են, թե չէ, ապա ցանկացած իրավիճակում, դա կլինի սուբվենցիա, դա կլինի հրատապ ինչ-որ խնդիր, էս պահի դրությամբ մինչև էս րոպեն ինչ խնդիր ներկայացրել ենք, միասին լուծում տրվել է։ Չի եղել մի խնդիր, որ ականջի հետև գցեն։ 

-Ամեն դեպքում դժգոհ չեք կառավարության հետ համագործակցությունից։ 
-Ամեն դեպքում՝ էն, ինչ վերաբերում է բուն աշխատանքին, երբեք էլ չեմ ասել, որ շոշափելի աշխատանք չի կատարվում։ Բոլորն էլ գիտեն, որ Գորիսում կոնկրետ երբևէ էսքան աշխատանք չի կատարվել, որ էս պահին կատարվում է։ Հիմա դրա կեսը մեր ընկերների շնորհքն է, մի մասը կառավարության հետ համատեղ ենք իրականացնում, մի մասը միջազգային ծրագրերով ենք իրականացնում։ Հիմա ինձ կոնկրետ հարց եք տալիս, թե աշխատանքը ոնց է կատարվում, ես ասում եմ՝ հստակ կատարվում է։ Հաստատ իմացեք, որ եթե ինչ-որ մի խնդիր լինի, որ ես իմանամ՝ դա անձնավորված է, էդ մասին կբարձրաձայնեմ։ Բայց մինչև էս րոպեն ես նման բան չեմ տեսել։ 

-Իսկ սահմանային իրավիճակը ինչպե՞ս է այդտեղ։ Ի վերջո, Սյունիքն այսօր խորը սահմանամերձ գոտի է դարձել նաև այդ նույն կառավարության աշխատանքի ու վարած քաղաքականության հետևանքով։ 
-Դե, սահմանային իրավիճակը էնպես է, որ մենք էնպես չի, թե մենք քնած ենք։ Մի բան լինի, ոնց միշտ մենք սահմանին ենք, հիմա էլ մեր հայրենիքի համար կանգնած՝ մինչև վերջ գանցող ենք։

-Ասում են՝ որոշակի ամրաշինական և նախապատրաստական աշխատանքներ են իրականացվում այդ տարածքում, որ վաղը, եթե հանկարծ հարձակում լինի արդեն Սյունիքի վրա, պատրատս լինի սյունեցին։ 
-Էդ մասով, կարծում եմ, ես լիազորություն չունեմ որևէ բան ասելու։

Վահե Մակարյան