Արցախի ուրացման քաղաքականությունը շարունակվում է

Վաշինգտոնում բանակցությունների սեղանին կա փաստաթուղթ, երեկ հայտնել է վարչապետ Նիկոլ Փաշինյանը՝ պնդելով, որ անակնկալներ այնտեղ չկան։ Որևէ դետալ, սակայն, Փաշինյանը չի հրապարակել՝ ընդդիմադիրներին կրկին առաջարկելով Արտգործնախարարությունում ծանոթանալ փաստաթղթին։

Վարչապետը հրաժարվել է ասել՝ արդյո՞ք առաջիկայում արդեն նախատեսվում է փաստաթղթի կամ որևէ հայտարարության ստորագրում, թե տեսակետները դեռ հեռու են։ 

Այնուամենայնիվ, Փաշինյանը սկզբունքային մի խնդրի շուրջ դարձյալ վերահաստատել է իր դիրքորոշումը:

«Հայաստանի Հանրապետության կառավարությունը և ՀՀ-ն, այս ամբիոնից մի շաբաթ առաջ ես դա հայտարարել եմ, պետք է հայտարարի, որ տարածքային նկրտումներ ոչ միայն չունի, այլև չի ունենալու, և սա է այն միակ սկզբունքը, որը մեզ շանս կտա պետություն ունենալ, հակառակ դեպքում՝ ասում եմ՝ եկեք նայենք, չորս կողմից ամեն ինչ անելու են, որ մենք չլինենք, որպես պետություն չլինենք, և անում են», - ասել է նա։

Խնդիրն այն չէ, որ 44-օրյա պատերազմից հետո որևէ բանական մարդ հավատում է ԼՂ անկախության կամ Հայաստանի հետ միացման օրակարգերին: Դրանք, Նիկոլ Փաշինյանի «փայլուն» քաղաքականության հետևանքով, մնացել են 44-օրա պատերազմի փլատակների տակ:

Հարցն այն է, որ չի կարելի շարունակ պնդել Ադրբեջանի տարածքային ամբողջականության թեզն՝ առանց փաստաթղթային երաշխիքներ ստանալու ԼՂ սուբեկտության, նրա ժողովրդի անվտանգության համար:

Սա մի ճանապարհ է, որ տանում է Արցախի ժողովրդի «ինտեգրման» ունիտար Ադրբեջանին, կամ, որ նույնն է՝ հայաթափության:

Հայաստանը չի կարող երաշխավորված անվտանգության հասնել՝ Արցախի ուրացման ճանապարհով:

Վահրամ Բագրատյան