Թամազյանին ասեք՝ մի հատ օրենք կարդա, նոր մեկնաբանիր, տղա՛ ջան․ Դավիթ Ղումաշյան

Վաղը Ալավերդիում ՔՊ-ն փորձելու է անվստահություն հայտնել «Ապրելու երկիր» կուսակցության կողմից ընտրված քաղաքապետ Արկադի Թամազյանին։ 

Վերջինս Mediahub-ին հայտնեց, որ նիստը չի կայանալու, քանի որ օրենքով նման գործընթաց չի կարող տեղի ունենալ։ ՔՊ-ն, սակայն, վճռական է տրամադրված, ավելին՝ իմփիչմենթի նախագծում նաև քաղաքապետի նոր թեկնածուի անուն է նշել՝ Շնողի նախկին գյուղապետ Դավիթ Ղումաշյան։ 

Mediahab-ը այս թեմայով զրուցեց Դավիթ Ղումաշյանի հետ։ 

-Պարոն Ղումաշյան, վաղը ՔՊ-ն անվստահություն է ուզում հայտնել Ալավերդու համայնքապետ Արկադի Թամազյանին, և նախագծում Ձեր անունը կա՝ որպես քաղաքապետի թեկնածու…

-Ոչ թե ՔՊ-ն է անվստահություն հայտնում, այլ ավագանու 14 անդամ (13+1 հոգի): 

-Արկադի Թամազյանն ասում է՝ դա ապօրինի գործընթաց է, և վաղը նիստ չի լինելու։ 

-Իսկ ինչո՞վ է հիմնավորել դրա ապօրինությունը։ 

-Հիմնավորումները պետք է, որ ներկայացրած լինի գրավոր տարբերակով Ձեզ, բայց բանավոր ասաց, որ մեկ անգամ արդեն ավագանին անվստահություն հայտնելու փորձ արել է, որը տապալվել է, և օրենքը թույլ չի տալիս մեկ տարվա ընթացքում երկրորդ անգամ նույն գործընթացը սկսել։ 

-Իսկ Դուք ուսումնասիրե՞լ եք օրենքը։ Ես կարող եմ ասել հետևյալը, որ ինքը սխալվում է, որովհետև համայնքի ղեկավարին անվստահություն հայտնելու համար պետք է լինի քվորում, իսկ քվորում իրենք չեն ապահովել։ Այդ իսկ պատճառով այդ՝ իրենց կոչած, իմ կողմից էլ կոչված պսևդոիմփիչմենթը չի կայացել։ Դա հստակ գրված է օրենքում, որ նիստը պետք է կայանա, պետք է լինի գաղտնի քվեարկություն, բայց ոչ նիստն է կայացել, ոչ՝ գաղտնի քվեարկությունը։ Էդ՝ մեկ։ 
Երկրորդը, եթե մեր նախաձեռնությունը, որ հիմա կա՝ անվստահության գործընթացը, իրենք սկսել էին մի ամիս առաջ, այսինքն՝ չեն վստահում իրենց համայնքի ղեկավարին, ճի՞շտ է։ Մենք էլ համաձայնել ենք իրենց հետ։ Դե, թող բարի լինեն, գան մեզ հետ մասնակցեն մեկ ամիս առաջ իրենց իսկ սկսած գործընթացին։

-Ձեր կարծիքով՝ սա ազնի՞վ գործընթաց է, քանզի ասում են՝ ՔՊ-ն միտումնավոր տապալում է ավագանու նիստերը, որպեսզի չկարողանա աշխատել քաղաքապետը, հետո ասեն՝ լավ չի աշխատում, եկեք՝ պաշտոնանկ անենք, ուրիշին բերենք։ 

-Էսպիսի մի բան ասեմ՝ մեր խմբակցությունը հենց տարվա սկզբից բոլոր նիստերին մասնակցել է, բոլոր հարցերը քննարկել է, տվել ենք առաջարկություններ, մեր առաջարկությունների մի մասը ընդունվել է, մի մասը չի ընդունվել։ Այսինքն՝ եղել է քաղաքական գործընթաց, մենք՝ ընդդիմություն, իրենք՝ իշխանություն։ Եղել է քաղաքական գործըթնաց, ու, կարելի է ասել, շատ բարեհաջող, որովհետև եղել են հարցեր, որոնք մենք ենք բարձրացրել՝ ընդունվել են, հարցեր են եղել՝ չեն ընդունվել։ Ընդհանրապես, էս ամեն ինչը սկսվել է հենց իրենց սխալ պահվածքից․ նշանակել են երկու տեղակալ՝ առանց ավագանու թույլտվության։ Մենք էլ ասել ենք՝ հարգելիներս, դուք ապօրինի եք նշանակել։ Եթե ապօրինի եք նշանակել, ազատեք մարդկանց աշխատանքից, էլի բերեք իրենց թեկնածությունը, մենք էդ տեղակալների անձերի հետ կապված՝ խնդիր չունենք, երկուսն էլ աշխատող տղերք են, ասել ենք՝ բերեք, քվեարկենք, միգուցե մենք էլ ենք կողմ քվեարկում, բայց գործընթացը ճիշտ տարեք։ Իրենք ճիշտ չեն տարել, ու սկզբունքորեն հենց էդտեղից է սկսել։ Մենք նույնիսկ արտահերթ նիստ ենք հրավիրեր մեր նախաձեռնությամբ՝ համայնքում հրատապ հարցեր են եղել, որոնք պիտի քննարկեինք, իրենք էլ են եկել էդ նիստին մասնակցել, ու ասել ենք՝ հաջորդ նիստին էդ տեղակալների հարցը չբերեք, մարդկանց ազատեք աշխատանքից, բերեք՝ մենք քվեարկենք, հետո էլի նշանակեք աշխատանքի, ու չեն արել, ու նմանատիպ լիքը հարցեր։

Եւ ավելին ասեմ՝ պարոն Թամազյանը շատ է անձնականացրել էս ամեն ինչը, սա քաղաքական պրոցես է, մի ժամանակ իրենք էին իշխանություն, մենք՝ ընդդիմություն, հիմա էլ, եթե քվեները վերցնում ես, մենք մեծամասնություն ենք, այլ ոչ թե փոքրամասնություն։ Բնակա՞ն բան չէ, որ ցանկացած ընդդիմություն ուզում է գալ իշխանության։ 

-Այո, բայց հերթական օրինական ընտրությունների արդյունքում, ինչպես հենց ձեր իշխանությունն է հաճախ ասում ընդդիմությանը։ 

-Ինչո՞ւ, օրենքը թույլ է տալիս նաև անվստահություն հայտնել, որով մենք շարժվում ենք՝ օրենքի տողին, տառին համաձայն։ 

-Ի դեպ, Դուք իշխանություն ուզում եք դառնալ ավագանու՝ իրենց խմբակցության անդամին «գողանալու» արդյունքում։ 

-Կներեք, էդ բառը Դո՞ւք եք էդպես օգտագործում։ Ես Ձեզ խնդրում եմ կոռեկտ խոսել, ի՞նչ է նշանակում՝ գողանալու, Դուք էդ մարդուն ճանաչո՞ւմ եք, ու վստահ եք, որ մենք իրեն գողացե՞լ ենք։

 -Ես այդ բառը «գողություն» անելու իմաստով չեմ օգտագործում, նկատի ունեմ՝ «վերբովկա» եք արել կամ ձեր կողմն եք քաշել, ինչպես ձևակերպում է մամուլը նրա մասին, այսինքն՝ սա ոչ թե վիրավորանք է, այլ քաղաքական գործընթացն է այդպես գնահատվում կամ որակվում։ 

-Մենք ոչ մեկին ոչ «գողացել» ենք, ոչ «վերբովկա» ենք արել, մարդը ունեցել է իր տեսակետը, մենք ունեցել ենք մեր տեսակետը, ընդամենը մեր տեսակետները համընկել են։ Մարդուն դուր չի եկել համայնքի գործող ղեկավարի աշխատաոճը, աշխատելաձևը, պահելաձևը, նույնն էլ՝ մեզ։ Հիմա դա եթե Դուք համարում եք «գողանալ», ուզում եք անունը դրեք «գողանալ», ուզում եք՝ դրեք «վերբովկա», բայց դա ճիշտ չի, էլի, մեկնաբանել այդպես։ 

-Արկադի Թամազյանն ինձ հետ զրույցում ասաց, որ նիստը վաղը չի գումարվելու, որովհետև նիստ գումարողը համայնքի ղեկավարն է, ինքն էլ դա չի անելու։ 

-Զանգեք Թամազյանին, ասեք՝ մի հատ օրենք կարդա, նոր մեկնաբանիր, տղա՛ ջան։ Եթե նիստը համայնքի ղեկավարը չի գումարում, ապա տեղակալն է անում, եթե տեղակալն էլ չի անում, ապա անում է տարիքով մեծը։ 

-Այսինքն՝ անկախ ամեն ինչից Դուք վստահ եք, որ վաղը նիստը կայանալո՞ւ է։ 

-Միանշանակ, իհարկե։ Մենք գործում ենք օրենքի սահմաններում, եղբայր, մենք չենք գործում անօրինական։ Եթե գործելիս լինենք անօրինական, գիտե՞ք՝ դրա մասին ինչքան մարդ գրած կլիներ, ինչքան թեմաներ կլինեին։ Իրենք ուղղակի կառչել են փրփուրներից, էլ չգիտեն՝ ինչ ասեն։ Հիմա իրենց բոլոր գործողությունները՝ վաղվա նիստի հետ կապված, անօրինական են լինելու։ Այո, իր իրավունքն էլ է, որպես ավագանու անդամ, չգա և չմասնակցի նիստին։ Բայց օրենքը հաջորդն է ասում՝ տեղակալը կա, որ պիտի վարի նիստը, եթե տեղակալն էլ չի վարում, ուրեմն ավագանին ընտրում է իրենց միջից տարիքով մեծին, որը և էլ վարում է նիստը։ Օրենքը բացեք՝ հստակ գրված է էնտեղ։ 

-Ամեն դեպքում չե՞ք կարծում, որ այս լարվածությունը լուրջ ճգնաժամի կբերի, քանզի մամուլը գրում է նաև, որ ՔՊ-ն ոչ մի կերպ չի համակերպվում նրա հետ, որ պարտվել է որոշ համայնքներում։ 

-Ես ինչքանով տեղյակ եմ՝ ՔՊ-ն շատ համայնքներում նաև պարտվել է և շատ համայնքներում շատ հանգիստ աշխատում է, օրինակ՝ Աբովյան համայնքում, տեղյա՞կ եք։ Բա ո՞նց են աշխատում, համագործակցում են մարդիկ իրար հետ, մտածում են համայնքի մասին, ոչ թե իրենց «կռեսլոյի» մասին, շատ կներեք։ Ու նմանատիպ համայնքներ լիքը կան։ Իսկ որ համայնքում, որ հնարավորություն կա իշխանություն վերցնելու՝ օրենքով սահմանված կարգով, խի՞ չպիտի վերցնեն։

 -Ընտրված իշխանություն կա, թողեք՝ թող աշխատի համայնքապետը։ 

-Կներեք, մի բան ասեմ․ միգուցե շատ անձնական բան եմ ասում, բայց ՀԱԿ-ը իր ամբողջ կուսակցական ռեսուրսով Ալավերդի համայնքում հավաքել է 300 ձայն, իսկ էն մարդը, որը իրենց խմբակցությունից դուրս է եկել (Սիմոն Զախարով-խմբ․), էդ մարդը անցած ավագանիում էլ է եղել ավագանու անդամ, բժիշկ մարդ է, հեղինակություն ունեցող մարդ է, ես Ձեզ վստահեցնում եմ՝ ինքը մինիմում 600-ից հազար ձայն կարող է հավաքել և հավաքել է։ Հիմա ո՞վ է փոքրամասնություն, մե՞նք, թե՞ իրենք։ 13 անդամ մենք ենք ունեցել, 13 անդամ՝ իրենք, ՀԱԿ-ը որոշել է միանալ իրենց, հիմա էս մարդն էլ իր հազար ձայնով որոշել է միանալ մեզ։

Լավ, Ձեզ մի բան ասեմ՝ բերել են միկրոավտոբուսներ, թվով վեց հատ, որին մենք կողմ ենք քվեարկել։ Բերել է «Ապրելու երկիր» հիմնադրամը։ Շատ գովելի է, իրոք, սրտանց եմ ասում՝ գովելի է, շնորհակալություն էլ եմ հայտնել անձամբ, բայց հարց եմ տվել, ասել եմ՝ հարգելի՛ գործընկերներ, միկրոավտոբուսներին միանշանակ կողմ ենք քվեարկելու՝ ինչ ձևաչափով ուզում է տրված լինի համայնքին, նվեր, ժամանակավոր, թե ինչ, բայց տրվել է համայնքին ի՞նչ ձևով։ Մի կերպ, երևի մի չորս անգամ հարցը տալուց հետո պատասխանել են հետևյալը՝ միկրոավտոբուսները աշխատելու են այնքան, ինչքան կառավարի «Ապրելու երկիրը»։ Այսի՞նքն, չհասկացա, ժողովրդին ասում եք՝ տեսեք, ունենք, բայց հենց մենք չլինենք՝ դուք չե՞ք ունենալու։ 

-Իսկ ավագանին, ի վերջո, ի՞նչ ձևով է ընդունել այդ միկրոավտոբուսները՝ որպես նվիրատվությո՞ւն, թե՞ ժամանակավոր օգտագործման։ 

-Նվիրատվություն համայնքին չկա, վերջին հաշվով, տենց բան չկա, որ դա պատկանում է համայնքին։ Ես, ճիշտն ասած, չեմ էլ կարդացել։ Պատկերացրեք՝ մենք չենք էլ կարդացել, բայց կողմ ենք քվեարկել, որովհետև իրոք ինքը լավ բան է։ Բայց էս չորս-հինգ ամիս է՝ բերել են, բայց չեն էլ աշխատում։

Վահե Մակարյան