Մահացել է ֆրանսիացի հայտնի մոդելավորող Պակո Ռաբանը

88 տարեկանում մահացել է ֆրանսիացի հայտնի մոդելավորող Պակո Ռաբանը: Նրա մահը հաստատել է իսպանական Puig խումբը, որը վերահսկում է Paco Rabanne նորաձևության տունը և օծանելիքի բիզնեսը։

Մոդոլավորողը մահացել է Ֆրանսիայի արևմուտքում գտնվող Ֆինիստեր դեպարտամենտում։

«Նա 20-րդ դարի նորաձևության ամենահեռատես դեմքերից մեկն էր, նրա թողած ժառանգությունը կմնա ոգեշնչման մշտական աղբյուր», - ասված է մոդելավորողի ստեղծած Paco Rabanne նորաձևության տան հաղորդագրության մեջ:

Պակո Ռաբանը ծնվել է 1934 թվականի փետրվարի 18-ին Բասկերի երկրում և աշխարհին հայտնի է դարձել 1960-ականներին։ Նա իր առաջին հավաքածուն ներկայացրել է 1966 թվականին Փարիզում, հագուստը պատրաստվել է այլընտրանքային նյութերից ՝ պլաստիկ, թուղթ, մետաղ։ Իր հավաքածուներում նա օգտագործել է երկրաչափական պրոգրեսիաներ, փորձեր կատարել բոլոր տեսակի նյութերի համադրությամբ։ Նրա նախագծերից էին փետուրներով անձրևանոցները, կաշվից, պլաստմասսայից և մետաղից պատրաստված հագուստը և այլն։

Նորաձևության դիզայների հանդերձանքները կրել են կինոյի ամենահայտնի աստղերը, այդ թվում ՝ Օդրի Հեփբըրն և Ջեյն Ֆոնդան։