Պետության գլխատման ճանապարհով են գնում․ Մետաքսե Հակոբյանը՝ Արցախում քաղաքական ինտրիգների մասին

Պետության գլխատման ճանապարհով են գնում․ Մետաքսե Հակոբյանը՝ Արցախում քաղաքական ինտրիգների մասին

Մեզ համար էլ էր անակնկալ Արթուր Թովմասյանի հայտարարությունը, մեր օրակարգում այլ հարցեր էին և այն, ինչ արեց նա, մեզ համար սպասելի չէր։ Այս մասին այսօր MediaHub-ի հետ զրույցում ասաց ԱՀ ԱԺ «Արդարություն» խմբակցության պատգամավոր Մետքասե Հակոբյանը՝ խոսելով երեկ ԱԺ նախագահ Արթուր Թովմասյանի հայտարարության մասին։

Հիշեցնենք, որ Արցախի Ազգային ժողովի նախագահ Արթուր Թովմասյանը երեկ հայտարարությամբ է հանդես եկել խորհրդարանի նիստի ժամանակ՝ նախագահ Արայիկ Հարությունյանին առաջարկելով Պաշտպանության պետական կոմիտե ստեղծել: Այդ կառույցում Թովմասյանը կոչ է անում ընդգրկել նախկին պետնախարար Ռուբեն Վարդանյանին և Արցախի Անվտանգության խորհրդի նախկին քարտուղար Սամվել Բաբայանին: Բացի այս, առաջարկել է նախագահին հրաժարական տալ.

«Պարո´ն նախագահ, եթե այդ մոդելը չաշխատեց, հիմա կարող է առաջին անգամ որևէ անձի ցավ պատճառեմ: Հրաժարականի դիմում ներկայացրեք, պարո´ն նախագահ, կամ դրեք ձեր վստահության հանրաքվեն»,-ասել էր նա։

Մետաքսե Հակոբյանի խոսքով՝ տեղի ունեցածը իշխանության հերթական խաղն է։

«Բոլորի մոտ այնպիսի տպավորություն է, որ ԱԺ նախագահը Արայիկ Հարությունյանի հրաժարականն է պահանջում, այդպես չէ: Իրականում, այստեղ քաղաքական մանևրումներ տեղի ունեցան, որը շատ նման է 2021 թվականին Հայաստանում տիրող քաղաքական պատկերին, երբ հայաստանյան իշխանությունները փորձեցին ցույց տալ, որ իրենք լեգիտիմ են։ Հիմա նույն սկզբունքով փորձում են գործել արցախյան իշխանությունները։ Արցախի իշխանությունների նկատմամբ բացարձակ վստահություն չկա, և այս իրավիճակում երկու տրամաբանությամբ ենք առաջնորդվում․ առաջինն այն է, որ այս իշխանությունը պայքարում է սեփական անձի փրկության համար, և տեղի ունեցող բոլոր գործողությունների շղթան այս ամենի մեջ շատ հանգիստ տեղավորվում է և օրինաչափ է։ Մյուս տարբերակն այն է, որ պետք է մտածել հայրենիքի փրկության մասին և, բնականաբար, այս դիտանկյունից շատ անբարո է տեղի ունեցողը, քանի որ բրյուսելյան հանդիպումից ու Նիկոլ Փաշինյանի հայտարարությունից հետո հանրահավաք իրականացնելը իրականությունից դուրս երևույթ էր։ Երեկ կրկին ներքին ինտրիգներ զարգացան»,-ասաց նա։

Հակոբյանի խոսքով՝ այն, ինչ կատարվում է, պարզապես նպատակ է հետապնդում խուսափել պատասխանատվությունից և այլ մեղավորներ գտնել։ Անկախ ամեն ինչից, ըստ Հակոբյանի, Արցախում կան սառը դատող քաղաքացիներ, քաղաքական ուժեր, որոնք պայքարում են ստեղծված իրավիճակի դեմ, սակայն նույն ժամանակ, իշխանությունն այնպես է անում, որ իրենք ևս հայտնվեն այդ օրակարգում։

«Արթուր Թովմասյանը նախագահի հրաժարականը չի պահանջում, այլ քաղաքական խժդժություն է մտցնում, որի պատասխանատվությունը, կարծում եմ, չեն գիտակցում: Պետության գլխատման ճանապարհով են գնում, որովհետև իշխանություններն արդեն ցույց են տալիս, որ երկիրը չունի պետական կառավարման համակարգ, չունի ռազմավարություն և այսպես, հրշեջի տրամաբանությամբ հրդեհներ են սկսել մարել, որոնք իրենց շուրջ են։ Այս ամենն ինչ-որ տեղ կընկալվեր, եթե երկրի գլխին սպառնալիք կախված չլիներ։ Հայտնվել ենք մի իրավիճակում, որտեղ ընդդիմությունը պետականամետ է, իսկ իշխանությունը ոչ մի գործողության մաս չէ»,-ընդգծեց պատգամավորը։

Մետաքսե Հակոբյանը հիշեցրեց, որ բազմաթիվ հարմար իրավիճակներ են եղել իշխանությունն անցնցում լքելու, բայց Արայիկ Հարությունյանն էր ասում, որ այս իրավիճակում չեն կարող ընտրություններ իրականացնել, և հիմա իշխանության որոշ անդամներ այս հարցն են առաջ քաշում.

«Ուզում ենք հասկանալ, թե որտեղից է ուղորդվում այս ամենը»,- հավելեց արցախցի պատգամավորը։

 

Լիաննա Թորոսյան