Ի՞նչ ապատեղեկատվություններ են․ Երասխում ամեն ինչ կարգին է․ գյուղապետ

Երասխում ամեն ինչ կարգին է, համայնքը կանգուն է, շատ ընտիր։ Այս մասին այսօր MediaHub.am-ի հետ զրույցում ասաց Արարատի մարզի Երասխ համայնքի գյուղապետ Սարո Այվազյանը։ 

Դիտարկմանը, թե տեղեկություն ունենք, որ գիշերը համայնքում համար 1 տագնապ է հայտարարվել, վերջինս պատասխանեց․ «Համար 1 չի եղել, ոչ մի արտառոց դեպք չի եղել, ժողովուրդն ապրում է բնականոն կյանքով, դպրոցը, մանկապարտեզը բաց է։ Եթե  այդ բոլոր հաստատությունները նորմալ աշխատում են, ի՞նչ պրոբլեմ կա։ Մեր գյուղում ամեն ինչ նորմալ է, ի՞նչ ապատեղեկատվություններ են տարածվում»,-ասաց նա։ 

Հիշեցնենք, որ ՄԱԿ-ի Անվտանգության խորհրդի՝ սեպտեմբերի 15-ի նիստում ՄԱԿ-ում ՀՀ մշտական ներկայացուցիչ Մհեր Մարգարյանը հայտարարեց, որ Ադրբեջանը ծրագրում է հարձակում իրականացնել Նախիջևանի ուղղությամբ։
«Կան հավաստի տեղեկություններ, որ Ադրբեջանը ծրագրում է ևս մեկ ռազմական հարձակում՝ ընդլայնելով ագրեսիայի աշխարահագրությունը, այդ թվում՝ Նախիջևանի ուղղությամբ, որպեսզի կյանքի կոչի Հայաստանի ինքնիշխան տարածքով արտատարածքային միջանցք ստեղծելու անօրինական իր նկրտումները»,-ասել է Մարգարյանը։

Սեպտեմբերի 13-ին՝ ժամը 00:05-ից, Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ ինտենսիվ կրակ էին վարել հայկական դիրքերի ուղղությամբ: Հակառակորդը կիրառել էր հրետանային միջոցներ, ականանետեր, ԱԹՍ-ներ և խոշոր տրամաչափի հրաձգային զինատեսակներ։ Կրակը դադարել է սեպտեմբերի 14-ին՝ ժամը 20։00-ից։ 

Այս պահի դրությամբ հայկական կողմը հայտնել է 135 զոհի մասին, վիրավորների հստակ թիվը դեռ չի հրապարակվել։

Լիաննա Թորոսյան