«Սառը ցնցուղ»՝ արևմտամետների գլխին
«ՀՀ-ԵՄ բանակցությունները որևէ կապ չունեն անդամության թեկնածության հնարավորությունների հետ»,- օրերս հարցազրույցում ասել է Եվրամիության (ԵՄ) արտաքին հարաբերությունների խոսնակ Պետեր Ստանոն։
Բրյուսելից բաց տեքստով հասկացնում են, որ իրենց օրակարգում Հայաստանի անդամակցության խնդիր չկա՝ չնայած դա ավելի քան ակնհայտ էր, եթե նույնիսկ Ստանոյի հայտարարությունը չլիներ:
Բրյուսելի դիրքորոշումն ինքնին հասկանալի է. ԵՄ-ն քաջալերում է Նիկոլ Փաշինյանի արկածախնդիր քաղաքականությունն այն մասով, որ խնդիրներ ստեղծի Ռուսաստանի համար, բայց առանձնապես հակված չէ ավելի մեծ պատասխանատվություն ստանձնել Հայաստանի առջև:
Հետաքրքիր է՝ Ստանոյի այս հայտարարությունից հետո ի՞նչ փաստարկներ են բերելու այն երեք- չորս քաղաքական ուժերը, ովքեր մտադիր էին ԵՄ-ին անդամակցելու հարցով հանրաքվե նախաձեռնել: Ինչպես տեսնում ենք՝ դրա քաղաքական, իրավական հիմքերը չկան:
Հայաստանի Սահմանադրությունը նման դեպքերում հանրաքվե սահմանում է գործընթացի ավարտին, երբ ԵՄ-ի ու Հայաստանի միջև կնքվի անդամության փաստաթուղթ ու փաստացի այն դրվի հանրաքվեի:
Ինչպես տեսնում ենք՝ Երևանի և Բրյուսելի այսօրվա հարաբերություններում նման փաստաթղթի անգամ տեսական հնարավորություն չկա:
Սա՝ իրավական կողմը, իսկ քաղաքական առումով՝ ԵՄ-ին Հայաստանի անդամակցության որևէ հիմք գոյություն չունի. նման ազդակներ Բրյուսելից չենք ստանում, ինչի մասին վերջերս ակնարկեց անգամ Նիկոլ Փաշինյանը:
Վահրամ Բագրատյան
