Հայտնի հյուրանոցի բակում մեքենա են հրկիզել. կան կասկածներ
Այսօր՝ մայիսի 5-ին, SHAMSHYAN.com-ը ֆոտոռեպորտաժ, տեսանյութ էր հրապարակել Երևանում տեղի ունեցած խոշոր հրդեհից։
Ինչպես դեպքի վայրից հայտնում է ֆոտոլրագրող Գագիկ Շամշյանը, նշված ավտոմեքենայում առաջացած կրակի հանգամանքները պարզելու համար այս պահին աշխատում են ՀՀ Ներքին գործերի նախարարության Ոստիկանության համայնքային ոստիկանության գլխավոր վարչության Մալաթիայի և Արմավիրի բաժինների ծառայողներն ու ՀՀ ՆԳՆ Ոստիկանության քրեական ոստիկանության գլխավոր վարչության Արմավիրի մարզային քրեական վարչության ծառայողները։
Քրեական ու համայնքային ոստիկանները պարզում են, թե ում է պատկանում նշված ավտոմեքենան, քանի որ համարանիշներ չեն եղել։
Ֆոտոլրագրողի տեղեկություններով, վառվող ավտոմեքենան հայտնաբերվել է հյուրանոցային համալիրի տարածքում ու արդեն ոստիկանություն է հրավիրվել հյուրանոցի սեփականատերը։
Կան կասկածներ, որ նշված ավտոմեքենայով կատարվել է հանցագործություն ու հետքերը թաքցնելու համար են այն հրկիզել։ Այդ վարկածը նույնպես ոստիկանները պարզում են։
Ինչպես ավելի վաղ հայտնել էր SHAMSHYAN.com-ը, այսօր՝ մայիսի 5-ին, խոշոր հրդեհ է տեղի ունեցել Երևանում։ Ժամը 15։45-ի սահմաններում ՀՀ Ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Իսահակ Գասպարյան փողոցի 30 հասցեում ավտոմեքենա է այրվում։
Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել են Երևանի հրշեջ-փրկարարական ջոկատից 1 մարտական հաշվարկ։
Հրշեջ-փրկարարները նախ կանխել են «ՎԱԶ 21099» մակնիշի ավտոմեքենայում առաջացած կրակը, ապա մարել այն, սակայն ավտոմեքենան վերածվել է մոխրակույտի։
Դեպքի վայր են ժամանել նաև ՀՀ ՆԳՆ ոստիկանության Պարեկային ծառայության Երևան քաղաքի գնդի 2-րդ գումարտակի 3-րդ վաշտի պարեկները՝ գումարտակի հրամանատարի տեղակալ Կարեն Ավետիսյանի գլխավորությամբ։
Տարածքը սահմանազատել են նույն վաշտի ավագ պարեկ Արտյոմ Արամյանն ու կրտսեր պարեկ Գոռ Ադամյանը:
Պարեկային ծառայությունը պարզում է ավտոմեքենայի սեփականատիրոջ և վարորդի ինքնությունը։
Հրդեհի հետևանքով, ըստ նախնական տեղեկությունների բարեբախտաբար տուժածներ չկան։
