Ավելի քան 251 մլն դրամ՝ պարեկային մեքենաները կահավորելու համար․ մատակարարը պատահական ընկերություն չէ

Ոստիկանությունը պարեկային մեքենաները կահավորելու համար պայմանագիր է կնքել «Ալիկանտե» ՍՊԸ-ի հետ։ Պայմանագրի գինը կազմում է 755 940 000 դրամ։ Ըստ պայմանագրի՝ պարեկային ավտոմոբիլներում տեղադրվելու է 450 mobile համակարգ, յուրաքանչյուրը 1 679 866 դրամ։ Այս պայմանագիրը կնքվել է մարտի 15-ին։

Մեկ այլ պայմանագիր էլ կողմերը կնքել են մարտի 24-ին։ Նոր համաձայնագրով կողմերը պայմանավորվել և հաստատել են 755 940 000 դրամից միայն 251 979 999 դրամը։ Սակայն ոչ թե նվազեցվել է մեկ մեքենայում տեղադրվող mobile համակարգի արժեքը, այլ քանակը։ Նախնական պայմանագրով նախատեսված 450 մեքենայում տեղադրվելիք նշված սարքավորումների փոխարեն նոր համաձայնագրով պայմանավորվածություն է ձեռք բերվել տեղադրել 150 մեքենայում։

Նշենք, որ այս «Ալիկանտե» ՍՊԸ-ն, որի ղեկավարը Ավետիկ Բաբինյանն է, առաջին անգամ չէ, որ ՃՈ-ին տեխնիկա է մատակարարում: Մինչ այս, ՍՊԸ-ն մայրաքաղաքի հետիոտնային անցումների վրա տեղադրել է արևային մարտկոցով լիցքավորվող լուսարձակներ, բացի այդ ընկերությունը ՃՈ-ին մատուցել է 395 միավոր պարեկային ծառայություն և հատուկ ուղեկցումներ իրականացնող, ինչպես նաև` ծառայողական և հետաքննչական ավտոմոբիլների վրա տեղադրված լուսաձայնային սարքավորումների, ռադիոկայանների տեխնիկական սպասարկման և վերանորոգման ծառայությունները, իսկ 2016թ-ին էլ 108 մլն դրամի դիմաց ընկերությունը ՃՈ տեսուչներին 700 տեսախցիկ գնելու պայմանագիր է կնքել։