Ռուսները կորցնու՞մ են վերահսկողությունը Բախմուտի նկատմամբ

Ուկրաինայի պաշտպանության ուժերը կարողացել են գրավել Դոնեցկի մարզի Բախմուտ քաղաքի մոտակայքում գտնվող գլխավոր հրամանատարական բարձունքները և մի քանի օր շարունակ կրակի տակ են պահել քաղաքը։ 

Այս մասին երկուշաբթի՝ հուլիսի 10-ին, Telegram-ում հայտնել է պաշտպանության փոխնախարար Աննա Մալյարը։

Նրա խոսքով՝ Ուկրաինայի Զինված ուժերը կրակային հսկողության տակ են պահում ռուսների բոլոր մուտքերը, ելքերը և քաղաքի շուրջ տեղաշարժերը։ 

Մալյարը նշել է, որ դա հնարավոր է դարձել այն բանի շնորհիվ, որ առաջ շարժվելով՝ Ուկրաինայի պաշտպանության ուժերը վերահսկողության տակ են վերցրել Բախմուտի շրջակայքում գտնվող հիմնական գերիշխող բարձունքները։

Հուլիսի 7-ին Մալյարը հայտարարել էր, որ Բախմուտում ռուսներն ընկել են ծուղակը և չեն կարողացել հեռանալ քաղաքից Ուկրաինայի զինված ուժերի գործողությունների պատճառով։