Բաքվի հերթական հաղթանակը կամ Փաշինյանի «հաջողությունը»

Ադրբեջանի նախագահի հատուկ հանձնարարություններով ներկայացուցիչ Էլչին Ամիրբեկովի վերջին աղմկահարույց հարցազրույցի նորությունն ամենևին էլ այն չէ, որ նա վերստին պնդում է, թե Հայաստանի Սահմանադրությունը պետք է փոխվի:

Այդ պահանջն արդեն վեց ամիս լսում ենք:

Կողմերն, ըստ Ամիրբեկովի, փոխադարձաբար ընդունելի տարբերակ են գտել նաև Ադրբեջանը Նախիջևանին միացնող ճանապարհի հարցում:

Պարզվեց՝ Երևանի ու Բաքվի փոխադարձ համաձայնությամբ խաղաղության համաձայնագրի նախագծից հանվել է տարածաշրջանային հաղորդակցություններին վերաբերող հոդվածը:

Ի դեպ, այս փաստը հաջորդ օրը հաստատվեց ՀՀ ԱԳՆ խոսնակի կողմից:

Փաստորեն, հերթական անգամ բանակցային գործընթացի նորության մասին մենք տեղեկանում ենք ոչ թե մեր պատկան մարմիններից, այլ հակառակորդ երկրի չորրորդական պաշտոնյայից:

Թե ինչո՞ւ է հայկական կողմն ինֆորմացիոն վակուում ստեղծում բանակցային գործընթացի շուրջ՝ կարծում եմ մեկնաբանություններն ավելորդ են:

Ի սկզբանե, խաղաղության գործընթացում մի քանի վիճահարույց խնդիրներ կային, որոնք վերաբերում էին ԼՂ-ին, դելիմիտացիայի/ դեմարկացիային, կոմունիկացիաների ապաշրջափակմանը:

Փաշինյանի «օգնությամբ» Ալիևը հաջողությամբ կլանեց Արցախը, իսկ հետո Հայաստանի փաստացի վարչապետին ստիպեց «կանաչեցնել» Հայաստանի մյուս «կարմիր գծերը»՝ դելիմիտացիայի/ դեմարկացիայի և կոմունիկացիաների ապաշրջափակման հարցերը դուրս թողնվեցին խաղաղության պայմանագրի քննարկվող տեքստից:

Ինքնին հասկանալի է, որ այս պարագայում խաղաղության պայմանագիրը որևէ կերպ չի լուծում Հայաստանի առջև ծառացած խնդիրները, անգամ չի երաշխավորում ինստիտուցիոնալ խաղաղությունը և Հայաստանի ապաշրջափակումը:

Բայց նույնիսկ այս պարագայում՝ Ադրբեջանը չի պատրաստվում խաղաղության պայմանագիր ստորագրել, որովհետև Հայաստանի առջև դրել է Սահմանադրությունը փոխելու պահանջ:

Այս մասին Հայաստանի ԱԳՆ-ն «խորհրդավոր» լռում է, իսկ իշխանամերձ շրջանակները հերթական անգամ ստում են՝ «դիվանագիտական հաջողություն» ներկայացնելով այն փաստը, որ «Զանգեզուրի միջանցքի» հարցն օրակարգից հանված է:

Կատարյալ սուտ, որովհետև այս հարցն ընդամենը հանվել է խաղաղության պայմանագրի տեքստից ու դրանից դուրս ճնշման գործիք է դառնալու Հայաստանի դեմ:

Վահրամ Բագրատյան