Եթե բանակցողը Արցախն է, ինչի՞ ես դու փաստաթղթեր ստորագրում․ նստացույցս անժամկետ է․ Իսրայելյանը՝ Փաշինյանին

Եթե բանակցողը Արցախն է, ինչի՞ ես դու փաստաթղթեր ստորագրում․ նստացույցս անժամկետ է․ Իսրայելյանը՝ Փաշինյանին

«Վերածնվող Արցախ» շարժման համակարգող Անաստաս Իսրայելյանն այսօր վաղ առավոտից Ստեփանակերտի Վերածննդի հրապարակում անժամկետ նստացույց է սկսել՝  ի հակադրում ՀՀ վարչապետի կողմից հնչեցրած հակաարցախյան հայտարարությունների և պլանավորած գործողությունների։ MediaHub-ի հետ զրույցում Իսրայելյանը նշեց, որ իրականում գիտակցում է, որ պայքարը բարդ է լինելու, քանի որ հիմա այնպիսի իրավիճակ է, որ որևէ հայտարարություն, մտքեր չեն կարող հստակ փոփոխություն բերել։ 

«Նստացույցն իր տրամաբանական շարունակությունն է ունենալու, ես ուզում եմ, որ Արցախի ժողովուրդն էլ հասկանա, որ քիչ ժամանակ ունենք, իմ պատկերացմամբ՝ 7 օր։ Փաշինյանն իր ասուլիսի  ժամանակ ասաց, որ փաստաթուղթ է ստորագրվելու, որը, հավանաբար, հունիսի 1-ին է լինելու։ Խաղաղության պայմանագրի ստորագրումը ծանր հետևանք է ունենալու մեզ համար։

Ադրբեջանն առաջնորդվելու է իր օրենքներով և Արցախում իր «կարգուկանոնն» է մտցնելու և որևէ միջազգային կառույց չի կարողանալու հետ պահել նրան։ Նպատակս այն է, որ հայաստանյան, արցախյան ժողովուրդը մեկ մարդու նման դուրս գա փողոց ու խանգարի, որ էդ մարդը որևէ թուղթ չստորագրի»,-ասաց նա։

Իսրայելյանի խոսքով՝ եթե Փաշինյանը ստորագրի այն փաստաթուղթը, որը հիմա օրակարգում է՝ Արցախն ամբողջությամբ կորցնելու ենք։

«Փաշինյանն առանց կաշկանդվելու էլ ասաց, որ ԼՂ-ն Ադրբեջանի կազմում է։ Միակ տարբերակը ժողովրդի համախմբումն է. ինքը վախկոտ է, ինքը չի կարող այսքանիս դեմ գնալ, եթե մենք միասնական ու վճռական լինենք»,-ասաց նա։

Հիշեցմանը, թե Փաշինյանը երեկ ընդգծեց, որ Լեռնային Ղարաբաղի հայության իրավունքների և անվտանգության հարցը պետք է քննարկվի Ստեփանակերտ-Բաքու երկխոսության միջոցով, Իսրայելյանն արձագանքեց․

«Լավ, եթե այդպես է, ապա ինքն ի՞նչ կապ ունի փաստաթղթերի ստորագրման հետ, դե թող որևէ հարցի չխառնվի: Այսինքն, եթե հարցը վերաբերում է մեր անվտանգությանը, ապա մենք պետք է բանակցնենք, եթե հարցը հանձնել, լքել, թողնելն է՝ ինքը պետք է ստորագրի։ Քաղաքական խաղ է, որ իր վրայից գցում է․ որ բանակցողը մենք ենք, ինչի՞ պետք է դու ստորագրես, չե՞ս գիտակցում, որ քո ստորագրած խաղաղությունից հետո մենք այստեղ ստրուկ ենք դառնալու։ Փաշինյանը, գուցե, լուրջ առողջական խնդիրներ ունի, ինչի՞ են մարդիկ սուս-փուս հետևում իր արածներին»,- շեշտեց Իսրայելյանը։

Վերջինս հորդորեց հայերին, որպեսզի առաջիկա օրերին հստակ քայլեր ձեռնարկեն հայաստանյան իշխանությանը կործանարար գործողություններից հետ պահելու համար։

«Իսկ մեր կառավարությունից ի՞նչ սպասենք, մնում է մտածել, որ կա՛մ անճար են, կա՛մ էլ շատ լավ համաձայն են Փաշինյանի հետ»,- հավելեց մեր զրուցակիցը։

Լիաննա Թորոսյան