Լեմկինի ինստիտուտը հայտարարություն է տարածել՝ Արևելյան Երուսաղեմում Կովերի պարտեզի հայկական թաղամասի մասին
Լեմկինի ցեղասպանության կանխարգելման ինստիտուտը հայտարարություն է տարածել Արևելյան Երուսաղեմում Կովերի պարտեզի հայկական թաղամասի նշանակության մասին և խորը մտահոգություն հայտնել թաղամասի ամբողջականությանը սպառնացող վտանգների կապակցությամբ։
Լեմկինի ինստիտուտը կոչ է անում Միացյալ Նահանգներին և Իսրայելի մյուս մերձավոր դաշնակիցներին պատասխանատվություն ստանձնել այս հողային վեճում՝ հայ համայնքի համար պատշաճ ընթացք ապահովելու համար:
«Այս աշնանը համաշխարհային հայկական համայնքն արդեն կորցրել է մեկ կարևոր պատմական հող՝ Արցախը (Լեռնային Ղարաբաղը), որը բռնի կերպով հայաթափվեց, երբ Ադրբեջանը ներխուժեց, կոտորեց հայերին և ահաբեկեց գրեթե ողջ հայ բնակչությանը։ Հայ ժողովուրդը չի կարող կորցնել մեկ ուրիշ:
Հայկական թաղամասը զբաղեցնում է Երուսաղեմ քաղաքի մոտավորապես մեկ վեցերորդ մասը։ Այն 1600 տարեկան է և թվագրվում է Հռոմի Կոստանդին կայսրի օրոք։ Երուսաղեմում հայերի առաջին բնակեցումը նախորդել է Կոնստանտինին: Հայերը Երուսաղեմում հաստատվել են մ.թ.ա. առաջին դարում, երբ Հայկական կայսրությունը վերահսկում էր Սիրիայի շրջակա տարածքները»,- ասվում է հայտարարության մեջ։
Ինստիտուտը նշում է, որ չնայած փոքրաթիվ հայ բնակչությանը, այս թաղամասը շարունակում է մնալ հայկական սփյուռքի ներկայության կարևոր մաս՝ որպես ամենահին գոյատևած կենդանի հայկական սփյուռք: Թաղամասում է գտնվում Հայ Առաքելական Եկեղեցու թեմը, և Երուսաղեմի հայկական թաղամասի մշակութային ժառանգությունը, որը պետք է պաշտպանված լինի կառուցապատողներից և զինված վերաբնակիչներից:
