Մեջքի ցավեր, կապտուկներ. ի՞նչ վնասվածքներ ունի Վիտալի Բալասանյանը
Արցախի հերոս Վիտալի Բալասանյանի մարմնի վրա տարբեր վնասվածքներ կան: Մասնավորապես, նա ցավեր ունի մեջքի շրջանում, սրտից ներքև կապտուկներ են առկա, աջ և ձախ ձեռքերի վրա արյան զեղումներ կան: Այս մասին MediaHub-ի հետ զրույցում ասաց Բալասանյանի փաստաբան Ռաֆայել Մարտիրոսյանը:
Նա տեղեկացրեց, որ ձերբակալվելուց հետո Բալասանյանը հետազոտվել է հիվանդանոցում, սակայն հետազոտության արդյունքներից այս պահին տեղեկացված չէ.
«Ժամը մեկին դատական նիստն է, պատրաստվում ենք բողոքարկել Վիտալի Բալասանյանի ձերբակալության իրավաչափությունը»,- նշեց նա:
Հարցին՝ Բալասանյանի որդու մարմնի վրա և՞ս կան վնասվածքներ, Մարտիրոսյանը նշեց, որ իր որդին ձերբակալվել է ԱԱԾ կողմից ներկայացված տեղեկությունների հիման վրա, բայց հարցաքննությունից հետո պարզ է դարձել, որ եղբոր՝ Վաչիկ Բալասանյանի, որդու՝ Արթուր Բալասանյանի ձերբակալության հիմքեր չկան և նրանք ազատ են արձակվել: Նույնը, ըստ փաստաբանի, վերաբերում է նաև Բալասանյանի ազգականին՝ Գարիկ Յուզբաշյանին, որը դեռ անազատության մեջ է, բայց նրա ազատ արձակման գործընթացն է ընթանում և գուցե դատական նիստից հետո նա արդեն ազատության մեջ լինի:
Հիշեցնենք, Վիտալի Բալասանյանը ձերբակալվել է երեկ երեկոյան:
