Բժիշկը զգուշացրել է խանութներում կոսմետիկ նմուշների փորձարկման վտանգների մասին
Կոսմետիկ նմուշները խանութներում վարակի հնարավոր աղբյուր են: Մաշկաբան Ալեքսանդրա Ֆիլեւան «Գազետա»-ին պատմել է, թե ինչով է կարելի վարակվել նման «փորձարկման» ժամանակ։
Նրա խոսքով՝ նմուշի կյանքի ընթացքում հարյուրավոր, իսկ երբեմն էլ հազարավոր մարդիկ դիպչում են դրան, և յուրաքանչյուրը թողնում է իր միկրոֆլորայի հետքերը: Մարդու մաշկը, լորձաթաղանթները և ձեռքերը պարունակում են հսկայական քանակությամբ միկրոօրգանիզմներ, այդ թվում՝ ինչպես անվնաս, այնպես էլ պոտենցիալ վտանգավոր բակտերիաներ, վիրուսներ և սնկեր:
«Վարակն օրգանիզմ կարող է ներթափանցել նաև մաշկի միկրոճաքերի միջոցով: Նույնիսկ աննշան վնասները՝ քերծվածքները, գրգռվածությունը ագրեսիվ լվացող միջոցներից, դառնում են միկրոբների մուտքի կետեր: Հատկապես խոցելի են այն հատվածները, որտեղ կան ծալքեր՝ շուրթերի անկյունները, եղունգների շուրջ մաշկը։ Այստեղ միկրոօրգանիզմներն ավելի արագ են բազմապատկվում և կարող են առաջացնել բորբոքում, քոր և նույնիսկ թարախակույտ»,- նշել է բժիշկը։
Վարակման վտանգի տակ են հատկապես թուլացած իմունային համակարգ, վնասված մաշկ կամ ալերգիկ ռեակցիաների հակում ունեցող մարդիկ:
Որոշ մանրածախ կետերում նմուշները մշակվում են ալկոհոլային լուծույթներով կամ ենթարկվում են ուլտրամանուշակագույն ճառագայթման: «Այս մեթոդները լիարժեք պաշտպանություն չեն ապահովում, բայց, այնուամենայնիվ, նվազեցնում են հարուցիչների տարածման վտանգը»,- ընդգծել է բժիշկը։
