Ազգային ինքնության թշնամիների երկակի ստանդարտները․ Արա Զոհրաբյան

Նիկոլ Փաշինյանի կառավարման խմբակի մեջ կան անձինք, որոնք չեն թաքցնում իրենց աթեիստական, ինչպես նաև պղծության տարածման հակումները և նախասիրությունները: Այս մասին Facebook-ի իր էջում գրել է «Զարթոնք» կուսակցության ղեկավար, փաստաբան Արա Զոհրաբյանը:

«Ինձ և գաղափարակից հայրենակիցներիս համար անվիճելի է, որ այս խմբակը պատերազմում է քրիստոնեության դեմ, մեր ազգային արժեքների դեմ, կարճ ասած՝ մեր ազգային ինքնության դեմ: Դրա օրինակները բազմաթիվ են:

Վերջին թարմ օրինակները- «ՀՀ տոների և հիշատակի օրերի մասին» օրենքից դուրս հանվեցին նախածննդյան տոները (հունվարի 3-ը, 4-ը և 5-ը):

Հիմա էլ Նիկոլ Փաշինյանի ճաշակին չեն համապատասխանում Հայաստանում սփռված ԽԱՉԵՐԸ: Կառավարության նիստի ժամանակ նա նշում է՝ «Դե պատկերացրեք, որ բոլոր վթարների առումով խաչքարեր, տապանաքարեր տեղադրենք, ինչ կստացվի արդյունքում»:

Վարչապետի պաշտոնը զբաղեցրած անձի խոսքը տրամաբանական (չեմ նշում՝ ճիշտ) կլիներ, եթե՝

1) Պետության համար հրատապ ու կարևոր հարցերը (սկսած անվտանգությունից ավարտված սոցիալական խնդիրներից) լուծված լինեին և հասնեինք խաչեր տեղադրելու կամ չտեղադրելու հարցին.

2) Մայրուղիների վրա չտեսնեինք ոգելից խմիչքների և խաղամոլությունը խրախուսող գովազդային մեծ ու վտանգավոր վահանակները:

Ազգային ինքնության այս թշնամիները հիմա էլ Ազատագրական շարժման անդամներին են համատարած կանչում վարժական հավաքների: Ինչպես պարզվում է համացանցից, վարժական հավաքների են կանչում նաև այլ քաղաքացիների, որոնք ընդդիմադիր կեցվածք ունեն:

Հ.Գ. Սաղմոս 73:8 - Նրանց ազգակիցներն իրենց սրտում միասնաբար ասացին. «Եկեք վերացնենք Աստծու բոլոր Տոներն երկրի երեսից»»։