Փաշինյանը Լոռու մարզպետի թեկնածու ունի. Վանաձորում կանխատեսում են՝ նա էլ երկար չի մնա

Լոռու մարզպետարանը շատ արագ արձագանքեց փոփոխություններին. մարզպետարանի կայքում մարզպետի մասին տեղեկություն արդեն չկա՝ ո՛չ նկար, ո՛չ անուն-ազգանուն։ 
Նիկոլ Փաշինյանը երեկ կառավարության նիստի ընթացքում որոշումն ընթերցեց՝ Լոռու մարզպետ Արամ Խաչատրյանն ազատվել է զբաղեցրած պաշտոնից։ Մինչ այդ արդեն նախկին մարզպետը չէր կարողացել մասնակցել գործադիրի այս տարվա  առաջին նիստին:

MediaHub-ի տեղեկություններով՝ Փաշինյանն արդեն մարզպետի թեկնածու ունի՝ “Քաղաքացիական պայմանագիր” կուսակցության վարչության միակ կին անդամ, ԱԺ ՔՊ խմբակցության պատգամավոր Արփի Դավոյանը։ Վերջինս հայտնի է, որպես Փաշինյանի հավատարիմ ու վստահելի մարդ կուսակցությունում:

Դավոյանը MediaHub-ի զանգերին չպատասխանեց, իսկ մարզպետարանի անձնակազմի կառավարման, փաստաթղթաշրջանառության և հասարակայնության հետ կապերի վարչության գլխավոր մասնագետ Աննա Գասպարյանը MediaHub-ի հետ զրույցում նշեց, որ ինքը տեղեկություն չունի Դավոյաի նշանակման հավանականության վերաբերյալ։ 

«Այստեղ չի եկել, այսօր մեզ պարոն Խաչատրյանը հրաժեշտ տվեց, շնորհակալություն հայտնեց և գնաց»,- փոխանցեց նա:
Մեր աղբյուրները հայտնում են, որ Դավոյանի նշանակումը չի ուշանա, հավանաբար հաջորդ հինգշաբթի, գործադիրի նիստի ժամանակ Դավոյանին կներկայացնեն որպես Լոռու նորանշանակ մարզպետ:

Վերջինս, ի դեպ, կարևոր առաքելություն ունի կատարելու՝ Վանաձորում ընտրությունների անցկացում: Մարզում խոսում են, որ Դավոյանը այս առաքելությունը պատվով դժվար թե կարողանա կատարել, այնպես որ չի բացառվում, որ մարզպետի պաշտոնում էլ երկար չի մնա:

Լիաննա Թորոսյան