«Ես երբեք որևէ միջանցքի մասին ոչինչ չեմ խոսել»․ Մարգարիտա Սիմոնյանը՝ Նիկոլ Փաշինյանին

«Ես երբեք որևէ միջանցքի մասին ոչինչ չեմ խոսել»,- այս մասին տելեգրամյան իր ալիքում գրել է RT հեռուստաալիքի գլխավոր խմբագիր Մարգարիտա Սիմոնյանը՝ մեկնաբանելով ՀՀ վարչապետ Փաշինյանի խոսքերն իր, Զատուլինի և Գաբրիելյանովի` երկիր մուտք գործելու արգելքի մասին։ Նա նշել է, որ խոսել է անձամբ Փաշինյանի մասին և ասել, որ նա հայ ժողովրդի դավաճանն է, որ նա ծախել և դավաճանել է հայկական բոլոր շահերը։

«Դա, ճիշտն ասած, ինձ այնքան էլ չի անհանգստացնում։ Ես, այնուամենայնիվ, Հայաստան գնալու մտադրություն չունեի և կյանքումս ընդամենը երկու անգամ եմ եղել․ 25 տարեկանում՝ ղեկավարի հետ գործուղման ժամանակ, 35 տարեկանում՝ Տիգրանի հետ՝  Տիգրանի ընկերոջ հրավերով՝ ծանոթանալու երկրին և Տիգրանի հարազատների հետ»,- գրել է Սիմոնյանը:

Նա նշել է, որ ՀՀ ներկայիս իշխանությունների օրոք «չէր էլ մեկնի Հայաստան»։ Սիմոնյանն առաջարկում է փոխել Փաշինյանի բերած պատճառաբանությունը («անարգանք ՀՀ ժողովրդի նկատմամբ») ակնհայտ հիմնավորումով. «Սիմոնյանին չեն սիրում ՀՀ իշխանությունները»։