Արցախցի գրող Աշոտ Բեգլարյանը վավերագրել է պատերազմի իրական դեմքը
Արցախցի գրող Աշոտ Բեգլարյանը Երևանի Ռուսական տանը ներկայացրել է իր «Կորած արևի նարինջը. վեպեր և պատմվածքներ պատերազմի և խաղաղության մասին» արձակ ժողովածուն՝ նվիրված Հայրենական մեծ պատերազմին։ Այդ մասին հայտնում են Ռուսական տան մամուլի ծառայությունից։
Ռազմական լրագրող և գրող Աշոտ Բեգլարյանի ստեղծագործությունը ճանաչում են նաև Հայաստանի սահմաններից դուրս։
Աշոտ Բեգլարյանի նոր գրքում տեղ է գտել Հայրենական Մեծ պատերազմի մասին վեպը, որին մասնակցել է Կերչում անհետ կորած Սանթուր պապը, ներկայացվում են նաև պատմություններ Ղարաբաղյան վերջին պատերազմների մասին, որոնց մասնակիցն ու ժամանակագրողը հենց ինքը՝ գրողն է:
Աշոտը իրական կյանքի օրինակներով ցույց է տալիս պատերազմի իրական դեմքը, միաժամանակ թույլ չի տալիս հերոսներին վհատության ու հուսահատության մեջ ընկնել, իսկ խավարին՝ կլանել արևը։
Բազմաթիվ ջերմ խոսքեր են ասվել գրողին. ռուսաց լեզվի հայտնի մասնագետ Ռուբեն Օսիպովը հիշել է, թե ինչպես էին ռուսաց լեզվի օրեր անցկացվում ողջ Ղարաբաղում, և միշտ Աշոտ Բեգլարյանի մշտական մասնակցությամբ, Նիժնի Նովգորոդցի գրող Վիկտոր Կոնոպլևը հուզիչ ողջույնի տեսաուղերձ էր ուղարկել՝ պատմություն գրողի հետ իր ծանոթության և նրանց ստեղծագործական բեղմնավոր տանդեմի մասին։ Լեռնային Ղարաբաղի վաստակավոր ուսուցչուհի Վերա Խաչատուրյանը խոստովանել է, որ վեց ամսվա ընթացքում առաջին անգամ է ժպտում, քանի որ շրջապատում շատ հարազատներ ու ընկերներ կան։
Արցախցի գրողը միջոցառումն ավարտել է հետևյալ խոսքերով․
«Մեր արմատները խորն են ու ամուր, և ուզում եմ հավատալ ավելի լավ ապագային, իսկ այսօրվա միջոցառումը ես ընկալում եմ որպես յուրօրինակ բարի նշան.․.»։
