«Մեր գործը չէ». ԱՄՆ փոխնախագահը բացառել է միջամտությունը Հնդկաստանի և Պակիստանի հակամարտությանը
ԱՄՆ փոխնախագահ Ջեյ Դի Վենսը վստահեցրել է, որ Միացյալ Նահանգները չի միջամտի Պակիստանի և Հնդկաստանի միջև հակամարտությանը։
Վենսը կոչ է արել կողմերին թուլացնել լարվածությունը, սակայն երկու միջուկային տերությունների միջև լարվածության սրումն անվանել է «մեր գործը չէ», գրել են ԶԼՄ-ները։
«Մենք կարող ենք փորձել խրախուսել այս մարդկանց մի փոքր թուլացնել լարվածությունը», - ասել է նա Fox News-ին տված հարցազրույցում։
ԱՄՆ փոխնախագահը շեշտել է, որ ամերիկյան կողմը «մտադիր չէ ներգրավվել պատերազմի մեջ, որը սկզբունքորեն մեր գործը չէ և որևէ կապ չունի Ամերիկայի՝ այն վերահսկելու կարողության հետ»։
Ջեյ Դի Վենսն ընդգծել է, որ քանի որ Վաշինգտոնը չի կարող ստիպել կողմերից որևէ մեկին զենքը վայր դնել, Միացյալ Նահանգները «կշարունակի դա անել դիվանագիտական խողովակներով»։
«Մենք հույս ունենք և ակնկալում ենք, որ սա չի վերաճի ավելի լայն տարածաշրջանային պատերազմի կամ, Աստված չանի, միջուկային հակամարտության», - ասել է Վենսը։
Ավելին, ըստ փոխնախագահի, Վաշինգտոնը նման սցենար չի սպասում, և «մենք չենք կարծում, որ դա տեղի կունենա հենց հիմա»։
Վենսի կինը՝ Ուշա Բալա Չիլուկուրի Վենսը, արմատներով Հնդկաստանից է։
Հնդկաստանը համարվում է պաշտոնական Վաշինգտոնի կարևոր գործընկեր, որի նպատակն է հակազդել Չինաստանի աճող ազդեցությանը։ Պակիստանը մնում է Միացյալ Նահանգների դաշնակիցը, չնայած նրա կարևորության նվազմանը հարևան Աֆղանստանից ամերիկյան ուժերի՝ 2021 թվականին դուրսբերումից հետո։
