Էս իմ պապական տարածքն ա, շուստրիություն ես անո՞ւմ․ Երևանում ծաղկում է ապօրինի «պառկինգի» բիզնեսը
Երեւանի կենտրոն վարչական շրջանի թաղապետարանի, Խնկո Ապոր անվան մանկական գրադարանի եւ Հովհաննես Թումանյանի անվան տիկնիկային թատրոնի շենքերի հետնամասի բակերում ընդհանուր օգտագործման համար նախատեսված ավտոկայանատեղիները անօրինական վաճառվում են։
Փաստն արձանագրել է MediaHub-ի թղթակիցը։ Մեր նկարահանող խումը քաղաքացիների ահազանգով այցելել է հիշյալ հատված եւ արձանագրել, որ տարածքում տեղադրված կոշիկի վերանորոգման կետի սեփականատերը (տեսանյութում այդպես ներկայացավ) շենքերի հարակից հատվածներում դեղին շարժական երկաթյա սյուներ է տեղադրել եւ կայանելու իրավունքը վաճառում է ժամը 300 դրամով։
Տպավորություն ստեղծելու համար, որ այդ գործունեությունն օրինական է, հիշյալ անձը աշխատակցին տրամադրել է հատուկ տարբերանշաններով համազգեստ՝ ասես նա քաղաքապետարանի աշխատակից է։
Ուշագրավն այն է, որ քաղաքապետարանի աշխատակից հիշեցնող անձը, կայանատեղի փնտրող վարորդներին, բակերում տեղ չգտնելու դեպքում հրավիրում է բազմահարկ շենքի նկուղային հատված՝ 1 ժամը 300 դրամ վճարելու պայմանով։
Մոտ 30 րոպե շենքի նկուղում կանգնելուց հետո մեր լրագրողը պահանջեց տրամադրել կայանատեղիի օրինականությունը փաստող ՀԴՄ կտրոն։ Տեսանյութում երեւում է, թե ինչպես է տարածքում ենթադրաբար անօրինական գործունեություն ծավալող անձն իր աշխատակցի հետ միասին վիճում լրագրողի հետ՝ նշելով, որ դա իր պապական տարածքն է ու վճարումը կատարվում է կանխիկ եղանակով։
Հրավիրում ենք Երեւանի քաղաքապետարանի եւ Պետական եկամուտների կոմիտեի ուշադրությունն այս հրապարակման վրա։ Հավելենք նաև, որ սա եզակի դեպքը չէ, Երևանի կենտրոնում ապօրինի «պառկովկաների» բիզնեսը շարունակում է ծաղկել ու, ինչպես նկատում ենք, բավականին գնաճ է արձանագրել:
Մանրամասն՝ տեսանյութում
