Խաբեության նոր որակ․ ներկայացել են նախարարության աշխատակիցներ, խոստացել տուն նվիրել, գումար շորթել

Նկարչուհի Զարուհի Մուրադյանը, որ նախորդ տարվա ողբերգությունից հետո պարբերաբար այցելում է Արցախից տեղահանված ընտանիքներին և օգնություն ցուցաբերում կարիքի մեջ հայտնված մարդկանց, երեկ բախվել է մի իրականության, որը նրան հանգիստ չի տալիս։ Մեր երկրում խոցելի խմբերի իրավունքները պաշտպանված չեն, խարդախության եղանակով նրանց կարելի է հեշտությամբ խաբել, մոլորեցնել։ 

«Պատկերացնո՞ւմ եք՝ բարոյական ի՜նչ անկում է Հայաստանում: Այցելել եմ մի ընտանիքի, որը 3 զոհ ունի պայթյունից՝ հայր և 2 որդի: Տանը մնացել են կանայք՝ տատիկը, մայրը ու 2 դուստրերը: Ու գտնվել են տականքներ, որ խաբելով, ներկայանալով Աշխատանքի և սոցիալական հարցերի նախարարության աշխատակիցներ, խոստացել են տուն հատկացնել այս անօգնական մարդկանց։ Նրանց հաջողվել է այդպես խաբել ևս 15 ընտանիքի և գումարներ շորթել: Պատկերացրեք խաբեության ինչ որակ է, որ եկել են իրենց տուն մի կապ բանալի տվել, ասել՝ «ձեր տան բանալիներն են»»,- MediaHub-ի հետ զրույցում ասաց տիկին Մուրադյանը։

Ըստ մեր զրուցակցի՝ խաբեբաները բնակապահովման քողի տակ, շորթման եղանակով տարբեր ամիսների՝ տարբեր չափի գումարներ են կորզել արցախցի տեղահանված ընտանիքներից։

Վերջիններս դիմել են փաստաբանի օգնությանը։ Անցել է ամիսուկես, սակայն ոստիկանությունից դեռ որևէ արձագանք չկա։ 

Զարուհի Մուրադյանն այսօրինակ դեպքերը բացառելու նպատակով հորդորեց զերծ մնալ կասկածելի գործարքներից։ 

Կից լուսանկարում սոցնախարարության աշխատակիցներ ներկայացած անձինք են։ Լուսանկարը տրամադրել է մեր զրուցակիցը:

Հունան Թադևոսյան