Արհեստական ինտելեկտի շնորհիվ անհատական համակարգիչների վաճառքը կավելանա

Անհատական ​​համակարգիչների շուկայի վերլուծաբանները արհեստական ​​բանականությունն (AI) անվանել են ոլորտի «փրկիչ»: Գրել է Reuters-ը։

Շուկայի մասնակիցների ներկայացուցիչները հայտարարել են AI-ի հետ արդյունավետ աշխատելու ունակ համակարգիչների լայն տարածման մասին։ «AI-ով աշխատող ԱՀ-ների հայտնվելը հաշվողական արդյունաբերության առանցքային պահն է»,- ասել է Intel-ի գործադիր տնօրեն Փեթ Գելսինջերը:

Ըստ AMD-ի գործադիր տնօրեն Լիզա Սուի` իր ընկերությունն ակնկալում է, որ ԱՀ-ի շուկան կաճի 2024 թվականին, քանի որ AI-ի աջակցությամբ աշխատող համակարգիչները վաճառքի կհանվեն:

Canalys-ի փորձագետների կարծիքով՝ արհեստական ​​ինտելեկտով աշխատող ԱՀ-ների ընդունումը կարագանա մինչև 2025 թվականը։ Փորձագետները նաև կանխատեսել են, որ 2027 թվականին ներկառուցված AI աջակցությամբ համակարգիչները կկազմեն շուկայական վաճառքի 60 տոկոսը:

Վերլուծաբանները կասկածի տակ են դնում այն, որ մինչ այս պահը բավականաչափ ծառայություններ կմշակվեն արհեստական ​​ինտելեկտին հասանելիություն ապահովելու համար: «Մեզ համար դեռևս պարզ չէ՝ կա՞ արդյոք «սպանող հավելված», որը կխթանի թարմացման շրջանը», - ասել է Columbia Threadneedle-ի ավագ հետազոտող-​​վերլուծաբան Դեյվ Էգանը, որը ներդրող է AMD-ում և Intel-ում:

Օգոստոսի վերջին IDC-ի վերլուծաբանները կանխատեսել էին անհատական ​​համակարգիչների շուկայի վերականգնում և աճ 2024 թվականին։ Փորձագետներն ակնկալում են շուկայի ուժեղ աճ 2027 թվականին։