Հաստատ ազատ անձնագրային կգտնեք․ ի՞նչ իրավիճակ է Երևանի անձնագրային բաժիններում
Հայաստանի անձնագրային բաժանմունքներում հերթերը նվազել են, ճգնաժամն անցել է, և դա պայմանավորված է նաև սեզոնով։ Այս մասին MediaHub-ի հետ զրույցում ասաց ՀՀ ՆԳՆ Միգրացիայի և ծառայության պետի տեղակալ Նելլի Դավթյանը։
«Հիմա չեմ կարող հերքել այն հանգամանքը, որ պահանջարկի իմաստով ամառվա այդ բարձր սեզոնն ավարտվեց, խոսքը ամառվա հերթերի մասին է, և այս պահանջարկի նվազմանը զուգահեռ՝ մեր գործը թեթևացավ տարբեր իմաստներով։ Բայց մենք կատարեցինք մի շատ կարևոր քայլ և, վերջապես, ներդրեցինք այն հիբրիդային մոդելով հերթերի կառավարման համակարգը, որի մասին դեռ տարեսկզբից ասում էինք։ Ե՛ւ ֆինանսական հարցեր կային այս մոդելը ներդնելու հետ կապված, որն ահագին ձգձգեց, և՛ վարչարարական ու բյուրոկրատական բնույթի տարբեր կարգավորումներ՝ ստիպված եղանք նախորդ մատակարարից հրաժարվել և ներգրավել նոր մատակարար»,- ասաց Նելլի Դավթյանը։
-Ի՞նչ մատակարարի մասին է խոսքը, ո՞վ էր այդ մատակարարը, որից հրաժարվել եք։
-Խոսքը migration.e-gov.am կայքը սպասարկող ընկերության մասին է, նախկինում VXSOFT ընկերությունն էր սպասարկում, որը Mulberry-ն է սպասարկում ամբողջ պետական համակարգում։ Եւ երբ որ մենք տարբեր քննարկումների, շուկայի դերակատարների, կառավարության աշխատակազմի, նաև քաղաքացիների ընդունելության վարչության հետ, ինչպես նաև ՆԳ նախարարության համապատասխան բաժինների հետ քննարկում էինք հերթերի կառավարման հարցը, ի վերջո, այս բազմակողմանի քննարկումներն ու մեր վիճակագրական ցուցանիշները մեզ բերեցին այն եզրահանգման, որ մենք պետք է ունենանք հավասարապես ծառայության մատուցման մոդել ինչպես օնլայն հերթագրվողների համար, այնպես էլ կենդանի հերթի ձևաչափը նախընտրողների համար։ Այդ պատճառով մենք բերեցինք այս կոնցեպտը, որ բոլոր անձնագրայիններում երկու մոդելն էլ հավասարապես կիրառելի լինի։ VXSOFT-ը հրաժարվեց մեզ այդ ծառայությունը մատուցել, և մենք ստիպված նորից սկսեցինք շուկայի հետազոտություն, նոր դերակատարների փնտրտուք, և հոկտեմբերի 1-ին պայմանագիր կնքվեց Early one ընկերության հետ, որն ուներ հերթերի կառավարման շուկայում հեղինակային իրավունք, և միանգամից իրենց հետ պայմանագիրը կնքվեց՝ չդրվեց մրցույթի։
-Իսկ հերթերի կառավարման այդ երկու մոդելները մեկը մյուսին չե՞ն խանգարում։
-Մենք հետևյալ սկզբունքով ենք կառավարում հերթերը, մենք ռեսուրսը ներդնում ենք, որպեսզի կառավարելի պահենք և ողջամիտ ժամկետների մեջ պահենք օնլայն հերթագրման սպասարկումը, այսինքն՝ բարձր սեզոնի ժամանակ ողջամիտ ժամկետը չպետք է գերազանցի 14 օրը։ Եւ եթե օնլայն հերթագրվածը տեղում չեղավ, նոր ավտոմատ համակարգը կանչում է կենդանի հերթի ձևաչափով հերթագրվածին։ Մի բան էլ ընդգծեմ, որ կենդանի հերթի ձևաչափով ով մոտենում է, ինքն է տեղում ծանրաբեռնվածությունն ու շանսերը գնահատում և որոշում՝ կտրոն քաշե՞լ, սպասե՞լ, որովհետև գուցե կուտակումն այդ պահին այնքան մեծ է, որ ինքը հասկանում է, որ այդ օրը իր հերթը չի էլ հասնի։ Մենք ռեսուրսը ներդնում ենք, որ խրախուսենք և հնարավորինս բոլորին բերենք օնայն հերթագրման դաշտ, ինչն ավելի կառավարելի է դարձնում սպասարկումը։
-Այս պահին որքանո՞վ են թեթևացել հերթերը, եթե գնահատում եք հերթերի ծանրաբեռնվածությունը, ի՞նչ աստիճանի է։
-Այո, թեթևացել են, այսօր մեր ամենաերկար հերթը ութ օր է տևում, բայց ինչ այս մոդելը ներդրել ենք, ընդ որում՝ պայմանագիրը կնքվել է հոկտեմբերի 1-ին, բայց պիլոտային ավելի շուտ էինք թողարկել այս նոր համակարգը։ Մինչև այս պահը որ օրը ցանկանաք հերթագրվել, այդ օրվա համար հաստատ ազատ անձնագրային կգտնեք, այդ թվում՝ Երևանում։ Էրեբունին, Մաշտոցը, Արաբկիրը մեր ծանրաբեռնված անձնագրայիններն են, բայց Ավանում, Դավթաշենում, Նուբարաշենում մինչև այսօր կարողացել ենք պահել հերթը այն մակարդակի, որ այսօր հաստատ կմոտենաք Դավթաշեն և կսպասարկվեք։
Վահե Մակարյան
