Քաղցկեղային բջիջները ոչնչացնելու նոր ձև են գտել 

Ամերիկացի գիտնականները նոր ձեւ են գտել քաղցկեղային բջիջները սպանելու համար՝ մերձակա ինֆրակարմիր լույսի միջոցով ամինացիանի մոլեկուլները խթանելով և դրանց թրթռում առաջացնելով: Մելանոմայի բջիջների վրա իրականացրած լաբորատոր փորձերը 99 տոկոսանոց արդյունք են տվել։ Այս մասին հայտնում է Euronews-ը։ 

Ամինացիանինի մոլեկուլները կիրառվում են կենսաբանական հյուսվածքները ներկելու համար, որի օգնությամբ էլ բացահայտվում է քաղցկեղը։ 

Ինֆրակարմիր լույսի ազդակը առաջացնում է պլազմոններ, որոնք հանդիսանում են մոլեկուլի ներսում էլեկտրոնների սինխրոն տատանումներ։ Դա էլ բերում է քաղցկեղային բջիջների մեմբրանների քայքայում։ Այս առնչությամբ գիտական հետազոտության արդյունքները հրապարակվել են դեկտեմբերին՝ Nature Chemistry հանդեսում։ Գիտնականները նշում են, որ մարդկանց վրա այս մեթոդի կիրառումը կարող է տեւել տարիներ։