Ֆրանսիացի զինվորականները գերեվարել են «Իսլամական պետություն Մեծ Սահարայում» խմբավորման առաջնորդներից մեկին
Ֆրանսիացի զինվորականները Մալիում գերել են «Իսլամական պետություն Մեծ Սահարայում» խմբավորման առաջնորդներից մեկին. հաղորդում է Agence France-Presse-ը՝ վկայակոչելով զինվորականներին։
«2022 թվականի հունիսի 11-ի լույս 12-ի գիշերը Բարհան ուժերի գործողությունը նպաստեց «Մեծ Սահարայում «Իսլամական պետության» նշանակալի դեմք հանդիսացող Ումեյա Ուլդ Ալբակայեի ձերբակալմանը»,- գործակալությունը մեջբերում է ֆրանսիական շտաբի տեղեկությունը:
Զինվորականները հայտնել են, որ Ալբակայեն ղեկավարել է ԻՊ-ի բջիջները Մեծ Սահարայում Մալիի Գուրմա շրջանում և Բուրկինա Ֆասոյի հյուսիսային Օդալան նահանգում: Բացի այդ, նա մի քանի հարձակում է կազմակերպել Մալիի ռազմակայանների վրա, այդ թվում՝ Գաոյում:
Զինվորականների խոսքով՝ «Բարխան» օպերացիայի ուժերը գերեվարվածներին կպահեն մի քանի օր, ապա կհանձնեն Մալիի իշխանություններին։
2014 թվականին Ֆրանսիան տարածաշրջանում սկսեց «Բարխան» հակաահաբեկչական գործողությունը։ Այս առաքելությանն աջակցում է նույն թվականին ստեղծված G5 տարածաշրջանային կառույցը։ Սահարա-Սահել շրջանում (Նիգեր, Մալի, Բուրկինա Ֆասո, Մավրիտանիա, Չադ) գործողության նպատակը ահաբեկչության դեմ պայքարն է և իրավիճակի կայունացումն այն մակարդակի, որ տեղական իշխանությունները կարողանան ինքնուրույն ապահովել անվտանգությունը: 2021 թվականի ամռանը Ֆրանսիայի նախագահ Էմանուել Մակրոնը հայտարարեց, որ Փարիզը կփոխի Սահելում իր ռազմական ներկայության մոդելը. «Բարխան» գործողությունն իր ներկայիս տեսքով կավարտվի և կփոխարինվի միջազգային դաշինքով, որը կներառի տարածաշրջանի երկրները և այլ գործընկեր երկրներ:
