Եգիպտոսն առաջարկում է Իսրայելին և ՀԱՄԱՍ-ին 60-օրյա զինադադարի նոր ծրագիր
Եգիպտոսն Իսրայելին և պաղեստինյան ՀԱՄԱՍ շարժմանը ներկայացրել է Գազայի հատվածում կարգավորման նոր առաջարկներ, որոնք ներառում են 60-օրյա զինադադար, մնացած իսրայելցի պատանդների ազատ արձակումը և պատերազմի ավարտի բանակցությունների սկիզբը։ Այս մասին հայտնում է էմիրաթական The National հրատարակությունը՝ վկայակոչելով աղբյուրներ։
Հրատարակության աղբյուրների համաձայն՝ ՀԱՄԱՍ-ի նախնական արձագանքը նախաձեռնությանը «խրախուսական» է եղել, սակայն Իսրայելի իշխանությունները դեռ ուսումնասիրում են առաջարկները։ Երկուշաբթի օրը Իսրայելը պատվիրակություն է ուղարկել Կատար՝ միջնորդների հետ քննարկելու եգիպտական ծրագիրը։
Եգիպտացի բանակցողները նախապես քննարկել են առաջարկի մանրամասները ՀԱՄԱՍ-ի բարձրաստիճան ներկայացուցիչների՝ շարժման քաղաքական բյուրոյի փոխնախագահ Խալիլ ալ-Հայայի, Շուրայի խորհրդի (շարժման խորհրդատվական մարմնի) նախագահ Մուհամմեդ Դարվիշի և Արևմտյան ափի բջջի ղեկավար Զահեր Ջաբարինի հետ։
«Եգիպտական պլանը նոր ճանապարհային քարտեզ է, որի հիմնական կետերը համաձայնեցվել են ամերիկացիների հետ», - ասել է աղբյուրներից մեկը:
Եգիպտական առաջարկների համաձայն՝ զինադադարի նոր փուլը կսկսվի 10 պատանդների ազատ արձակմամբ, ներառյալ Պաղեստինյան անկլավում պահվող հինգ ամերիկացի քաղաքացիներից մի քանիսը կամ բոլորը: Աղբյուրները նշում են, որ նրանց ազատումը պետք է աստիճանաբար լինի:
Յուրաքանչյուր փուլում Իսրայելը կազատի որոշակի թվով պաղեստինցի բանտարկյալների։ Առաջին ալիքը, ըստ հրատարակության, կարող է ներառել պաղեստինյան խմբավորումների բարձրաստիճան ներկայացուցիչներ։ Առաջարկվում է նաև վերացնել Իսրայելի կողմից Գազայի հատված մարդասիրական օգնության, վառելիքի և առաջին անհրաժեշտության ապրանքների մատակարարման արգելքը։
Բացի այդ, եթե բանակցությունները հաջողությամբ պսակվեն, կարող են քննարկումներ սկսել Գազայի հատվածից իսրայելական զորքերի ամբողջական դուրսբերման և մշտական հրադադարի հաստատման շուրջ։
