Ի՞նչ կտա Փաշինյանի այցը Սանկտ Պետերբուրգ
Անցած շաբաթավերջին Ռուսաստանի երկու պաշտոնյաներ հանդես են եկել հայտարարություններով, որոնք, մեղմ ասած, հակադրության մեջ են այն ճգնաժամի հետ, որն այսօր առկա է հայ-ռուսական հարաբերություններում:
Ռուսաստանի զինված ուժերի գլխավոր շտաբի պետ Վալերի Գերասիմովը տարին ամփոփող բրիֆինգ է տվել Ռուսաստանում հավատարմագրված ռազմական կցորդներին, որի ընթացքում անդրադարձել է նաև հայ-ադրբեջանական կարգավորման ուղղությամբ Մոսկվայի ջանքերին։
«Մոսկվան ջանքեր է գործադրում Հարավային Կովկասում տրանսպորտային կոմունիկացիաների բացման, Հայաստանի ու Ադրբեջանի միջև խաղաղության համաձայնագրի կնքման, երկու երկրների միջև առավել սուր հակասությունները վերացնելու ուղղությամբ»,- ասել է Գերասիմովը:
Արդեն մեկ տարի է՝ Նիկոլ Փաշինյանի իշխանությունը հրաժարվում է բանակցել մոսկովյան հարթակներում: Եթե անկեղծ լինենք, ապա Բաքուն էլ առանձնապես շահագրգռված չէ ռուսական միջնորդությամբ, ավելին, արեց ամեն ինչ, որպեսզի Նոյեմբերի 9-ի եռակողմ հայտարարությամբ հաստատված ստատուս-քվոն փոխվի:
Բայց ուշագրավ է, որ հայտարարությունը տարածում է ոչ թե Ռուսաստանի ԱԳՆ-ն, այլ Գլխավոր շտաբը:
Սա տարածաշրջանից հեռացող կայսրության ուղերձ չէ, ավելին՝ Մոսկվան հասկացնում է, որ անգամ ուժի կիրառմամբ հետամուտ է լինելու իր տարածաշրջանային շահերի պաշտպանությանը:
Մինչ Երևանում խոսում են ռազմատեխնիկական համագործակցության դիվերսիֆիկացիայի մասին և ակտիվ աշխատանքներ են տանում Հնդկաստանի և Ֆրանսիայի հետ՝ չթաքցնելով դժգոհությունը Ռուսաստանից, Հայաստանում երկրի դեսպան Սերգեյ Կոպիրկինը հանդես է եկել ուշագրավ հայտարարությամբ:
«Մոսկվան և Երևանը քննարկում են ռազմատեխնիկական համագործակցության ոլորտում երկրների միջև նոր համաձայնագրեր»,- ասել է նա:
Արդյո՞ք դրական դինամիկա կա հայ-ռուսական հարաբերություններում ու այդ համատեքստում ի՞նչ կտա Հայաստանին Նիկոլ Փաշինյանի այցը Սանկտ Պետերբուրգ: Չավարտված այցի արդյունքների մասին դժվար է գնահատականներ տալ, արձանագրենք միայն, որ երեկ Հայաստանը ստանձնեց ԵԱՏՄ նախագահությունը:
Վահրամ Բագրատյան
