«К западу от рая»․ պատմական անդրադարձների ու իրապատումների նոր գիրք՝ Արցախի մասին
Կորսված հայրենիքի՝ Արցախի մասին ևս մի նոր գիրք է գրվել։
«К западу от рая» ռուսալեզու գրքի հեղինակ Կարեն Մանասյանը MediaHub-ին պատմեց, որ գիրք ունենալու ցանկություն չի ունեցել, ինքը գրող կամ բանաստեղծ չէ, սակայն հիվանդանոցում բուժում ստանալիս, երբ ազատ ժամանակ է ունեցել՝ ֆեյսբուքյան հարթակում կիսվել է իր մտորումներով։ Հետագայում, ընկերների առաջարկով ու իր հայրենակիցների աջակցությամբ՝ դրանք հավաքագրվել ու գիրք է դարձել։
«Գրքի մեջ զետեղել եմ հոգեբանական մտորումներ, հայրենասիրական ու պատմական պոեմներ, իրապատումներ ու պոեզիա։ Պատմական անդրադարձ կա 1920 թվականի Շուշիի կոտորածի վերաբերյալ, երբ հրաշքով փրկված մի երեխա տեղափոխվում է Մարտունու Ճարտար։ Հետագայում մազապուրծ եղած այդ երեխան դարձել է ընկերոջս պապը։ Նրա պատմությունը ողբերգական լինելուց առաջ՝ նախ, ուժեղ կամքի մասին է։ Եվս մեկ իրական պատմություն կա կուսապատցի Հովհաննես Աթաբեկյանի մասին։ Մոտ 200 տարի առաջ նա Ասկերանում 2 անգամ պարսիկների շրջափակումից հանել է հայ և ռուս զինվորականներին, կանխել Արցախի դեմ ասպատակությունը։ Հետագայում նրան շնորհվել է գեներալի կոչում»,-նշեց հեղինակը։
Կարեն Մանասյանը Ճարտարի դպրոցում դասավանդում էր անգլերեն լեզու։ Իր խոսքով՝ 19 տարվա և 19 օրվա ստաժ ունի։ Տեղահանվելուց հետո դասավանդման առաքելությունը շարունակել է Հայ-Ռուսական (Սլավոնական) համալսարանում։ Սակայն, մի օր պարզվեց, որ նևրոզ հիվանդություն է ձեռք բերել, ինչը հանգեցրել է թողնել աշխատանքն ու հոգ տանել առողջության մասին։ Այդպես ծնվել է գիրք ունենալու մտահղացումը։
«К западу от рая» գիրքը տպագրվել է ռուսերեն լեզվով՝ ավելի լայն լսարանին հասանելի լինելու համար։
Գրքի տպագրման ֆինանսավորումն իրականացվել է Աշոտ Ջիվանյանի նախաձեռնությամբ՝ "Մոնթե-Ավո" բարեգործական հիմնադրամի միջոցներով։
Հունան Թադևոսյան
