Հասարակությունը հանդես եկավ որպես միասնական ճակատ՝ ընդդեմ ապստամբության փորձի․ Պուտին
Ռուս ժողովուրդը համերաշխություն դրսևորեց՝ որպես միասնական ճակատ հանդես գալով ռազմական ապստամբության փորձի դեմ․ այս մասին հայտարարել է նախագահ Վլադիմիր Պուտինը՝ ՇՀԿ անդամ պետությունների ղեկավարների խորհրդի նիստում։
«Ռուս ժողովուրդը կոնսոլիդացված է, ինչպես երբեք։ Ռուսական քաղաքական շրջանակները և ողջ հասարակությունը հստակ ցույց են տվել միասնությունն ու բարձր պատասխանատվությունը հայրենիքի ճակատագրի համար՝ հանդես գալով որպես միասնական ճակատ զինված ապստամբության փորձի դեմ»,- ասել է Պուտինը։
Միաժամանակ նախագահը շնորհակալություն է հայտնել ՇՀԿ երկրների իր գործընկերներին, ովքեր աջակցել են Ռուսաստանի իշխանությունների գործողություններին ապստամբության փորձի ժամանակ։
«Մենք դա բարձր ենք գնահատում»,- ընդգծել է նախագահը։
Հիշեցնենք, որ Ռուսաստանում ռազմական ապստամբության փորձ է կատարվել Վագների ՊՄԿ հիմնադիր Եվգենի Պրիգոժինի կողմից։ Հունիսի 24-ին նա վերահսկողության տակ վերցրեց Դոնի Ռոստովը և շարասյուններ ուղարկեց դեպի Մոսկվա։ Նույն օրը երեկոյան Կրեմլը հայտնել է, որ Բելառուսի նախագահ Ալեքսանդր Լուկաշենկոն բանակցություններ է վարել Պրիգոժինի հետ, վերջինս համաձայնել է միջոցներ ձեռնարկել իրավիճակը դեէսկալացնելու համար։
Անդրադառնալով Ռուսաստանի դեմ պատժամիջոցներին՝ նախագահը նշեց․
«Հիմա, փաստորեն, հիբրիդային պատերազմ է մղվում մեր դեմ, աննախադեպ մասշտաբով կիրառվում են հակառուսական ոչ լեգիտիմ պատժամիջոցներ։ Ուզում եմ ընդգծել, որ Ռուսաստանը վստահորեն դիմադրում է և շարունակելու է դիմակայել արտաքին ճնշմանը, պատժամիջոցներին և սադրանքներին»,- վստահեցրել է նախագահը։
