Ռուսաստանից ժամանած անվանի մարզիկները Ստեփանակերտում սեմինար մարզումներ են անցկացնում
Արցախի մարտարվեստների ասոցիացիայի նախաձեռնությամբ՝ Ռուսաստանի Դաշնությունից ժամանած աշխարհահռչակ մի խումբ մարզիկներ Ստեփանակերտում խառը մենամարտերի (MMA) սեմինար մարզումներ են անցկացնում:
«Արցախպրես»-ի թղթակցի հետ զրույցում Արցախի մարտարվեստների ասոցիացիայի նախագահ Գարեգին Աղաբալյանը հավաստիացրել է, որ նախաձեռնությունը շարունակական է լինելու:
«Ստեփանակերտում երկօրյա վարպետաց դասեր անցկացնելու նպատակով Ռուսաստանից ժամանել է 6 պրոֆեսիոնալ մարզիկ: Դրանց մասնակցում են Արցախի մարտարվեստների ասոցիացիայի խառը մենամարտերի մարզիկները: Նպատակն մարզական նոր գիտելիքների և փորձի ձեռքբերումն է, ինչպես նաև այս մարզաձևի նկատմամբ հետաքրքրություն առաջացնելը»,-ասել է Գ. Աղաբալյանը։
Ռուսաստանյան «Ֆայթ Նայթ» կազմակերպության չեմպիոն Մորիս Բորեանը երկրորդ անգամ է Արցախում:
«Արցախցի մարզիկների հետ հանդիպումներն անչափ ոգևորիչ են: Արցախում ենք վերապատրաստելու և նոր հնարքների մեր փորձը փոխանցելու այստեղի մարզիկներին՝ հաղթանակների նախապատրաստելու նպատակով:Այստեղ նկատել ենք, որ երեխաները շատ են հետաքրքրված այս մարզաձևով»,-ասել է Մ. Բորեանը:
