Թուրքիան ողջունում է ՀՀ ԱԳ նախարար Միրզոյանի մասնակցությունը Անթալիայի դիվանագիտական ֆորումին

Անկարան ողջունում է Հայաստանի իշխանությունների որոշումը՝ ընդունել արտաքին գործերի նախարար Արարատ Միրզոյանին ուղղված հրավերը մասնակցելու Անթալիայի դիվանագիտական ֆորումին, որը տեղի է ունենալու մարտի 11 -ից 13-ը։ Ինչպես հայտնում է «Անադոլու» գործակալությունը, այս մասին հայտարարել է Թուրքիայի ԱԳ նախարարության մամլո քարտուղար Թանջու Բիլգիչը։ 

«Այսպիսի փոխադարձ քայլերը օգնում են երկրների միջև երկխոսության ընդլայնմանը և փոխվստահության առաջացմանը հարաբերությունների ամբողջական կարգավորման համար», - ասել է պաշտոնյան։ 

Հիշեցնենք, որ երկուշաբթի ՀՀ ԱԳ մամուլի քարտուղար Վահան Հունանյանը հայտարարել էր, որ Արարատ Միրզոյանն ընդունել է Անթալիայի դիվանագիտական ֆորումին մասնակցելու հրավերը։