Արցախի իշխանությունն այլևս հույսեր չի՞ կապում Փաշինյանի իշխանության հետ. նախագահականից պարզաբանում են
Արցախի պետնախարար Ռուբեն Վարդանյանը երեկ հայտարարեց. «Հայաստանի և Ադրբեջանի ղեկավարների երեկվա ելույթները հաստատեցին, որ Արցախի համար միակ հնարավոր ընտրությունը պայքարն է։ Պետք է պայքարել՝ հույսը դնելով սեփական ուժերի վրա»:
Սա, նկատենք, թերևս եզակի դեպք է, երբ Արցախի իշխանությունը բացահայտ Փաշինյանին և Ալիևին դրեց նույն հարթության վրա: Նախկինում, երբեմն, Արայիկ Հարությունյանը փորձել է ատամ ցույց տալ Փաշինյանին (բացառապես քաղաքական դաշտի ճնշման ներքո), բայց նման բացահայտ դեմարշ…. թեև ի՞նչ դեմարշ՝ առարկաները իրենց անուններով կոչելու փորձ չի եղել:
MediaHub-ը դիմեց Արցախի նախագահի խոսնակ Լուսինե Ավանեսյանին՝ ճշտելու, թե արդյոք սա նշանակում է, որ Արցախի իշխանությունները իրավիճակի հանգուցալուծման հարցում այլևս հույս չեն կապում ՀՀ իշխանությունների հետ և մնացել են միայնակ: Ինչպես նաև հետաքրքրվել էինք, թե Արդյոք Արայիկ Հարությունյանը կիսում է Ռուբեն Վարդանյանի հնչեցրած այս տեսակետը:
Պատասխանը լակոնիկ էր.
«Արցախի անվտանգության խորհրդի հայտարարությունը պաշտոնական տեսակետ է»,- նշեց խոսնակը:
Հիշեցնենք, որ նախօրեին Արցախի ԱԽ հայտարարության մեջ, մասնավորապես, ասվում է.
«ՀՀ վարչապետի՝ նախօրեին տեղի ունեցած ասուլիսի ընթացքում հնչեցրած մի շարք պնդումներ և տեսակետներ առաջացրել են մտահոգություններ, քանի որ չեն համապատասխանում ինչպես համազգային պայքարի գաղափարներին, այնպես էլ Արցախի Հանրապետության բնակչության և իշխանությունների որդեգրած դիրքորոշմանը:
Մենք գիտակցում ենք բոլոր այն հետևանքները, որոնք բխում են մեր որդեգրած քաղաքական գծից և վերահաստատում ենք մեր դիրքորոշումն առ այն, որ Արցախի ինքնիշխանությունը և պատմական հայրենիքում ազատ ու անկախ ապրելու իրավունքը բացարձակ արժեքներ են: Որևէ պարտադրանք կամ սպառնալիք չի կարող մեզ հետ պահել պայքարը շարունակելու մեր կայացրած որոշումից»:
Սպասենք զարգացումների՝ Փաշինյանն այս ամենը միանշանակ հենց այնպես չի թողնի...
Նարե Գնունի
